Jump to content

Change

Lub Neej Tsis Tau Sib Sau


  • Please log in to reply
15 replies to this topic

#1
PAUB1zaugNCO1sim

PAUB1zaugNCO1sim

    Bachelor Degree 1

  • Members
  • 153 posts
Reputation: 1
Neutral
Twb tau 4 xyoos lawm uas lub sij hawm rov ncig los txog rau lub caij nplooj ntoos ntsuab xiab, cua tuaj laj ntxiag tshuab tej me nplooj laim uas pes tshaws rau tom ub tom no.  Tus neeg tseem pom zim zuag tsis txawv li 4 xyoos thaum ub. Tseem zaim muag pom tus neeg tham lus luag nyav, hais lus luag ntxhi, khiav ncig yuj lis yeev.  Cov lag zeb nyob rau hauv lub Zoo Cemetery muaj ntau heev, ib leej dhau ib leej, ib kab dhau ib kab.  Txhua daim lag zeb, nyias muaj nyias neeg hmov tshua txog, me paj ntoos coj tuaj txawb ua zoo nkauj thiab tawg paj paug.  
     Muaj ib lub tsheb tsav tuaj nres rau ntawm ib txog me nyuam kev.  Muaj ib tug tub hluas tawm hauv lub tsheb los, nws nqa tau ib tag pajntshua nplaim liab liab los tso rau ntawm ib daim lag zeb.  Nws sawv ntawd ntsia daim lag zeb nruj nruj xam yuj yees rau puag pem tej.  Pom me tsheb khiav yeev, me cua tseem nplawm txias ziag, nws rov nyo mus rau ntawm daim lag zeb, ua kua muag ntws si tawm los.  Qhia tsis tau rau leej twg, yam uas zais rau hauv nws nruab siab.  Nws khoov zog los zaum rau ntawm daim lag zeb ib sab, ntsia daim duab hluas nkauj nyob rau ntawd luag nyuj nyav tuaj rau tus tub hluas.  Daim duab lub me ntsej muag tseem tshiab khiv tsis txawv tus thaum tseem ua neej nyob ua rau tus tub hluas lub kua muag haj yam ntws sis so.  Nws cev tes los mus plhws daim duab ntawm daim lag zeb thiab tsa ncauj los seev tias,

"Eb, Sua os Sua, yog vim li cas koj thiaj li tseg kuv nyob ib leeg rau hauv lub ntiaj teb no, es kuv yuav ua cas nco koj mus kom txog rau hnub twg kuv txoj sia thiaj mam tu es thiaj mam tsis nco xav txog koj lawm os, Sua.  Cas me tsheb nim khiav yeev los twb tsis pom koj yuav los qhov twg los.  Es tsam no, koj mus nyob rau qhov twg lawm os, qhia kuv ib los seb ma Sua.  Yog kuv ntxov paub tias koj yuav zoo li no, kuv yeej tsis pub koj lub kua muag poob li.  Koj puas paub tias, koj yog tus muaj nqis tshaj nyob rau hauv kuv lub neej.  Yog vim li cas koj thiaj li yuav tau tso kuv tseg zoo li no?  Yog vim li cas thiaj yuav tseg kuv nyob ib leeg tsis nrog luag muaj tus hlub, es puas yuav nrog luag muaj tau txij nkawm rau tom ntej os Sua?"

Nws muab teg pajntshua nplaim tso rau ntawm daim lag zeb ib sab, thiab hais tias, " Sua, kuv nqa cov paj no tuaj rau koj os, yog xim uas koj nyiam tshaj thiab yog hom paj uas koj xav tau tas li. koj puas pom na Sua? koj puas zoo siab os? yog vim li cas hnub no es tsis pom koj los txais paj luag ntxhi li yav tag los lawm? Sua, koj puas sawv nraim nrog kuv os? Cas kuv yuav kho siab ua luaj, es koj nyob qhov twg, puas pab hlub kuv thiab os Sua?"

Nws cev tes rov mus plhws daim duab ntawm daim lag zeb dua ib zaug ntxiv, nws lub kua muag ntws si poob nthav mus xyaw cov nroj uas tab tom tuaj ntsuab xiab thiab nyuam qhuav txiav tag.  Ib me pliag txawm muaj ib tug me npauj npaim dawb dawb ya los tsaws ntawm daim lag zeb, nws thiaj li luag nyav, thiab tsa ncauj los ke hais lus ke quaj nrog tias,

"ab me kab npauj npaim, koj puas yog kuv tus Sua os lod? yog koj yog nws no, koj puas paub tias kuv nco koj npaum li cas, kuv tsis paub yuav ua kuv lub neej li lawm os.  hos yog koj tsis yog nws no, koj pab xa kuv cov lus no mus kom txog nws tias sim neej no, tsis muaj nws lawm es kuv lub neej tsis paub yuav muab coj mus pib li cas tuaj no os lod."

Nws tab tom cev tes yuav mus muab tus npauj npaim, ces tus npauj npaim txawm ntxuaj tis ya hlo lawm.  Nws rov nyob ib leeg, ntsia qhov twg los tsuas pom tsheb khiav yeev tom kev xwb, ua rau nws rov zaum ntawm Sua daim lag zeb ib sab, xav ub xav no.  Xav tias cas ib ntsais muag xwb, twb dhau los tau 4 xyoos lawm tiag.  Sij hawm dhau mus lawm zuj zus, cas tus tuag, tuag twj ywm mus lawm tsis hnov ntiaj teb, hos tus nyob, nyob txom nyem siab li cas los ntshe tus tuag yeej yuav pom tsis txog thiab paub tsis tau.  Ua rau nws xav txog thaum tseem muaj Sua, cas tsis luaj twg, yus tsis hlub kom txaus nkaus, es yuav cia Sua muaj txoj kev tusiab los kua muag, es thaum kawg, thiaj li tau tso txoj hau kev no rau nws taug.  Yog Sua tseem nyob, ntshe twb yuav thov txim ntawm Sua es kom nws zam txim rau es thiaj li tsis lwj lwj lub siab tag npaum li no.  Ua rau tus tub hluas thiaj rov xav txog rau puag thaum uas nyuam qhuav ntsib Sua thawj thawj zaug.


TO BE CONTINUE.....
The flash back will post up soon....thanks for reading this story
NCO kuv tsis PLOJ
NCO ntsoov kuv MOG
NCO kuv tag tiam NO


KhawsCia6Kuv Tag1SIM

#2
PAUB1zaugNCO1sim

PAUB1zaugNCO1sim

    Bachelor Degree 1

  • Members
  • 153 posts
Reputation: 1
Neutral
Hauv lub zos Fresno yog ib lub zos uas muaj neeg coob nyob kawg nkaus li.  Lub zos Fresno no nyob rau hauv plawv xeev California, nyob rau sab hnub poob (West Coast).  Lub caij no yog lub caij ntuj sov, uas neeg twb kawm ntawv tag thiab los so lawm tsuas tshuav cov neeg mus hauj lwm thiab muaj lwm yam ua thiaj tseem khiav tsheb khiav yeev xwb.  Lub caij ntuj so no, tab tom yog lub caij uas tshav ntuj kub heev, cua tuaj nplawm ntws, tej hnub kuj kub lug.  Hauv lub zos Fresno no, muaj ib tug tub hluas hu ua TSAB HAWJ.  Tsab siab li ntawm 5'4, hnyav li ntawm 138 lbs., muaj 25 xyoos, tab tom kawm ntawv tag rau hauv Fresno City College.  Hauv Tsab tsev neeg muaj nws niam thiab nws txiv, ob tug muam, ib tug hu ua Mim, muaj 24 xyoos, tus thib ob hu ua Kabyeeb muaj 22 xyoos, thiab ib tug kwv hu ua Ntxiag, muaj 18 xyoo.  Tsab yog ib tug tub hluas uas nyiam uasi heev, nyiam mus party nrog cov phoojywg, thiab nyiam nrog neeg tso dag tso luag los laug caij.  Nws yog ib tug neeg nyob tau ib lub neej tsis nco qab ntshaw leej twg, nws tsev neeg kuj ua neej muaj xws li cov neeg uas muaj thiab, es tsis nco qab xav txog tej yam uas yuav txhawj txog nyiaj kuv phem, ua rau nws tsis nco qab txog kev nyuaj siab.  

Nyob rau hauv lub zos Fresno kuj muaj ib tug ntxhais hu ua SUA LIS.  Sua yog ib tug ntxhais ho txawv Tsab lawv tsev neeg lawm deb.  Hauv Sua tsev neeg tsuas muaj Sua niam, ib tug niam hluas hu ua PajHuab muaj 19 xyoos, ib tug nus hu ua TubNtxawg muaj 16 xyoos. Ntawm Sua tus kheej, nws muaj 23 xyoos, siab li 5'1, hnyav li 102 lbs., kawm ntawv tom Fresno State College, tshuav li ib xyoos ntxiv nws mam kawm tag nws qhov major.  Sua kuj nyiam mus uasi thiab tabsis mas nws ho tsis tshua nyiam mus party, nws kuj nrog tej phoojywg mus uasi thiab, tabsis ho yog mus ntaus npas, mus taug kev tej tag rov los tsev xwb.  Sua tsev neeg kuj nyob ib yam li luag thiab, tiamsis mas Sua lub neej txawv Tsab lub lawm deb qhov tias Sua txiv tau tag sim neej lawm, Sua niam tsis paub ntawv dabtsi li thiab, ces qhov twg los kuj yog tos Sua nkaus thiab xwb.  

Muaj ib hmos muaj ib lub party nyob rau pem Sua lawv lub college.  Hmo ntawd Sua cov phoojywg thiaj li tau tuaj yaum Sua mus nrog lawv mus uasi ib hmos.  Sua nyob hauv tsev saib TV ib pliag ces txawm hnov khob khob qhov rooj.  Sua sawv mus qhib lub qhov rooj, pom KabZuag, Ntxhais, thiab Huab lawv peb leeg tuaj sawv ntawm qhov rooj.

     "Nej muaj chaw mus qhov twg cas nej nim ua zam tag li lawm na?" Sua nug.

     "Hey Sua, mus hloov khaub ncaws es koj nrog peb mus party pem school os, lom zem heev li laiv." Ntxhais tsa ncauj los hais Sua.

     "Tsam kuv niam cem os."

     "Oy, Sua e, nrog peb mus xwb, koj niam yeej tsis cem li os.  Tsis tas li ntawd, peb twb tsis mus ntev ntev, peb mus saib ib pliag xwb, thiab mus lom zem me ntsis xwb na" Ntxhais rov hais ntxiv

     "Ua li mas, yog li tos kuv mus hloov khaub ncaws tag tso, kuv los peb mam mus nawb" Sua teb loo ces nws txawm qhib qhov rooj rau lawv los hauv tsev ces nws txawm mus ploj rau tom txaj lawm.

Thaum Sua tawm rov los, nws hnav ib ce tiab dawb dawb luv txog ntawm nws lub hauv caug thiab rau nkawm khau luj taws siab xim dawb phim nrog nws cev khaub ncaws.  Nws muab nws cov plaub hau qaws ua ib lub yis tws thiab tso ob kaj plaub hau ntawm nws hauv pliaj dauv los rau ntawm nws lub plhu.  

     "WOW! koj zoo nkauj kawg li os Sua aw!" Hnub hais luag nyav ntsia ntsoov rau Sua.

     "Tsis zoo os, lam hnav xwb.  Txhob ntsia ntsia kuv heev heev kuv txaj muag thiab meb, nej na...hehehe...los tsuag tsuag peb mus os, tsam ces ho late lawm thiab"  

     "Ua li mas, yog npaj tau lawm ces, los peb mus mas"  KabZuag teb ceev nrooj rau lawv peb leeg.

Thaum lawv mus txog pem tsev kawm ntawv, neeg twb tuaj coob kawg lawm thiab, vim tias twb yog li 8:30 pm lawm.  Lub sij hawm ntawd yog lub sij hawm thaum uas Tsab thiab Sua nkawv thiaj li tau los sib ntsib.  Tsab thiab Tsab cov phoojywg lawv tuaj koom kev lom zem nyob rau hmo ntawd thiab.  Tsab hnav lub ris dub, nrog lub tsho muaj ntsej dawb, nws luag qhas ntxhias nrog nws cov phoojywg zoo li nws muaj kev lom zem heev.  Lawv sawv daws nyias muaj nyias kev lom zem, cov muaj phoojywg coob kuj muaj txoj kev lom zem xauv npo, cov muaj tsawg, los kuj nrhiav txoj kev lom zem kom xws li cov muaj coob ib yam thiab.  Sua thiab Sua cov phoojywg lawv kuj muaj kev lom zem, muaj suab luag thiab ua las voos tsis tso tseg li.  Ib pliag Sua lawv los zaum rooj ze tsawv rau ntawm Tsab thiab Tsab lawv cov phoojywg.  Tsab ib tug phoojywg thiaj hais rau Tsab tias, Tsab, tus hluas nkauj hnav cev tiab dawb tov haib kawg li, ib pliag slow dance koj kuj sim mus nug nws mus dance nrog koj seb nws puas txawj hais lus zoo mas.  Tsab tsa hau ntsia xam pom Sua, zoo li nws kuj nyiam Sua lawm thiab tiag....Ces ib pliag zoj, cas lawv tso loo zaj slow song rau cov neeg muaj khub thiab cov uas tsis muaj khub los kom mus nrhiav khub los huab las voos uake. Tsab thiaj sawv tsees mus nug Sua seb Sua puas yuav kam mus huab las voos nrog Tsab.

     "Wss, tus muam, koj puas yuav kam mus nrog kuv huab zaj las voos no ne yom?" Tsab nug

     "Tau kawg mas"  Sua teb Tsab rov qab

Tsab cev tes los tuav nkaus Sua tes, ces coj Sua mus rau tom lub chaw huab las voos.

    "Koj lub npe hu li cas nab tus muam"

     "Kuv, kuv hu ua Sua xeem Lis os, es koj nev?"

     "Kuv hu ua Tsab xeem Hawj.  Es koj muaj pes tsawg xyoo lawm ne yom Sua?

     "kuv muaj 23 xyoos lawm os, laus lawm thiab tiag, es koj nev Tsab, koj ho muaj pes tsawg xyoo thiab?  Es koj nyob hauv no los koj tuaj qhov twg tuaj ne yom?

     "Kuv muaj 25 xyoos os, kuv nyob rau hauv Fresno no thiab mas.  Sua, nyob rau hmo no, koj puas lom zem thiab os?  kuv ntsia mas zoo li koj thiabkoj cov phoojywg nej lom zem heev li os, puas yog nab?"

     "kuj lom zem thiab mas, yog yus muaj phoojywg nrog yus thiab ces kuj lom zem heev li os, kuv twb ntsia zoo li koj lom zem kawg li thiab nev, puas yog ma Tsab?"

Nkawv ua ua las voos ib me pliag, Tsab xav zoj tau hauv nws lub siab tias, nug Sua seb Sua puas tau muaj tus hlub.  Nws ntsia Sua ces nws txawm nug tias,

    "Sua, kuv lam nug xwb koj txhob xav li cas yom, koj puas tau muaj hmoob nab yom?"  

Thooj txhij thaum Tsab nug lo ntawd tu kiag, lub suab paj nruag twb nrov tag zaj nkauj twb xaus neeg twb pib tso tes zom zaws lawm.  Tsab thiaj li hais tias,

     "Ib me pliag yog lawv rov tso nkauj slow dua, koj rov nrog kuv dance dua yom, puas yuav tau nab?"

     "Tau kawg mas Tsab, koj rov los nug kuv dua xwb mas nawb"

Thaum Sua los txog ntawm nws cov phoojywg, lawv nug nws tias seb nws puas lom zem cas zoo li nws lom zem kawg li, ua rau Sua lub ntsej muag liab tag.  Ces ib pliag zoj xwb, KabZuag hais rau Sua, Huab, thiab Ntxhais tias, lig lawm thiab ces kom lawv sawv daws mus tsev.  Ces lawv txawm sawv hlo los mus, Sua lawv los hla Tsab thiab Tsab cov phoojywg lawv lub rooj los mus lawm, Sua tig tuaj ntsia rau Tsab, luag nyav thiab tsa ces los yoj "sib ntsib dua" rau Tsab.  Tsab tig los ntsia Sua yam zoo li uas yuav yog zaum kawg uas nws pom Sua lawm xwb.  Hauv Tsab lub siab xav mus caum Sua, nug me ntsis txog rau ntawm Sua tus kheej, tabsis mas nws tseem txaj muag heev vim nkawv nyuam qhuav sib ntsib kiag hmo ntawd xwb, yog no Tsab thiaj luag nyav rov rau Sua thiab xwb es ua ib siab tsis mus nug Sua tus xov tooj.  Tabsis hauv Tsab lub siab mas, twb pib nyob tsis tswm li lawm.

Thaum los txog rau sab nraum zoov uas ntawm cov lub chaw nres tsheb lawm, Huab hais rau Sua tias,

     "Sua, tus guy uas puag tab nrog koj ua las voos ntawd zoo nraug heev li laiv.  koj puas nyiam nws thiab nab?  oh, es koj puas nug nws lub npe hu li cas es nws nyob rau qhov twg tuaj na?"

     "Nws hu ua Tsab Hawj, nws nyob rau hauv Fresno no thiab mas, tabsis kuv tsis nco qab nug tias nws muaj pes tsawg xyoo lawm no es"

Sua teb li ntawd tag, ces lawv txawm nkag rau hauv tsheb los mus tsev lawm.  Tabsis hauv Sua lub siab, zoo siab heev li xav tsis txog tias cas sij hawm txawm siv tag lawm es Sua twb tseem xav rov nrog nws ua las voos dua ib zaug.  Xyov puas yuav muaj txoj hmoo ntsib rau tom ntej no lawm tabsis mas hauv Sua lub siab twb nyiam Tsab lawm es Tsab puas paub li ntawd thiab.


TO BE CONTINUE....
Ua tsaug rau nej los nyeem nawb....mam rov los sau dua ib me chim os...
NCO kuv tsis PLOJ
NCO ntsoov kuv MOG
NCO kuv tag tiam NO


KhawsCia6Kuv Tag1SIM

#3
PAUB1zaugNCO1sim

PAUB1zaugNCO1sim

    Bachelor Degree 1

  • Members
  • 153 posts
Reputation: 1
Neutral
Lub party twb dhau tag, thaum uas Tsab los txog tsev, twb yog li ib tag hmo dua, nws muaj kev lom zem heev ua rau nws sab heev tsis muaj ib qho zog hlo li.  Nws los zaum rau ntawm xaus loos, tab tom tav caij nws txiv laub hauj lwm thaum ib tag hmo dua ntawd los thiab, nws txiv hais tias,

"me tub, ua cas koj es pheej yuav mus laij hmo dhau hmo tas li xwb.  Txog caij lawm yuav tsum los nyob hauv vaj hauv tsev thiab ma ua cas koj es kawm ntawv mas ho tias mus kawm ntawv, thaum tsis kawm ntawv lawm los yeej tsis nyob hauv tsev hlo li thiab. nej tej hluas no mas, cas yuav muaj fai ua luaj li."

"txiv, kuv loj lawm, kuv yeej paub tej yam uas kuv xav ua lawm na, thiab tej kuv mus no los, twb tsis yog mus ua loj ua laib nav, kuv tsuas nrog phoojywg mus uasi xwb na, cas pheej yuav hais tas zoj tas li thiab xwb os."

"Tub aw, yog koj paub tej yam uas koj yuav ua ntawd ces kuv ua txiv kuv yeej tsis hais koj ua luaj li no li los mas.  ua cas es koj yuav muab txoj kev uasi saib loj ua luaj li na."

"Txiv, nyob teb chaws no lawm, peb yuav tsum tsis txhob nyob nyob hauv tsev tas li xwb ma, yuav tsum tau mus ncig uasi rau sab nrauv thiab es thiaj li yuav paub tias lub neej nyob rau teb chaws no nws zoo npaum li cas yus thiaj pom thiab hos."

"Ua li mas tub e, hais koj zaum twg los koj pheej yuav li koj zaj xwb ces kuv laj laj hais koj li lawm thiab."

Nws txiv hais tas nrho ces nws txiv txawm mus rau tom txaj lawm.  Tsab tso TV saib ib pliag ces nws txawm xav txog Sua.  Xav txog rau thaum uas nkawv ua las voos uake.  Sua yog ib tug ntxhais zoo nkauj kawg thiab siab zoo heev.  Nws xav paub txog ntawm Sua ntxiv thiab yuav ua li cas thiaj li yuav paub tau Sua lawm tom ntej no vim xov tooj los twb tsis nug, hos chaw nyob los twb tsis nug li thiab.  Nws nyob nyob ib pliag tsis muaj laij dabtsi ces nws txawm mus pw lawm.  

Muaj ib hnub thaum tav su, Tsab thiab Tsab ob tug phoojywg lawv mus ncig uasi tom Woodward Park.  Lawv mus txog tov, cas muaj ib co hmoob twb tuaj nyob rau ntawm thaj chaw uas lawv yuav npaj siab mus nyob lawm.  Tabsis mas thaum Tsab tsa muag los ntsia no ua cas zoo li yog Sua nyob tov thiab.  Tsab txawm hais rau nws ob tug phoojywg tias,

"nkawv, neb saib seb, hluas nkauj tuaj uasi tov thiab tiag.  Neb puas kam mus nrog kuv peb mus ncig uasi ib pliag tov seb puas tau nrog hluas nkauj tham me ntsis na?"

Tsab ib tug phoojywg hu ua Meej thiaj li hais tias,

"Tsab, koj vwm lawm pob, tsam lawv twb muaj hluas nraug lawm ces raug lawv cov hluas nraug muab hlais os."  

"No, kuv xav mas tej zaum lawv tsis muaj thiab os."

Ceeb, uas yog Tsab ib tug phoojywg thiab, thiaj li hais tias,

"Tsab thiab Meej, yog no peb kuj mus nrog lawv tham ib pliag seb peb puas tau nrog lawv mus ncig uasi mas los."

"mus ces mus xwb tiag." Meej teb.

Lawv thiaj li mus txog rau ntawm Sua thiab nws cov phoojywg lawv, Sua ob tug phoojywg zoo tshaj nrog Sua nyob rau ntawd thiab.  Tsab lawv los txog rau tnawm Sua lawv ces Tsab tus phoojywg Ceeb tawm los hais tias,

"Nyob zoo os cov muam, nej tuaj uasi thiab los?"

"Aws, peb tuaj uasi thiab mas, es nej tuaj thiab los cov nus?"  Sua lawv peb leeg thooj txhij teb rov qab.

Thaum ntawd Tsab yeej ntsia ntsuj ntsoov mus rau Sua xwb.  Tabsis mas muaj ib yam me ntsis teeb meem rau lub sij hawm tam sim ntawd thiab.  Ceeb kuj ho nyiam raug Sua thiab.  Ceeb los kuj tsis paub tias Tsab twb ho nyiam Sua lawm.  Ceeb pheej nrog Sua tham lus yam luag ntxhwb ntxhi ua rau Tsab tsis paub yuav hais dabtsi tas nrho li tsuas nyob tus ntsoos ntsoos lawm xwb.  Hos Meej pheej nrog KabZuag thiab Hnub, uas yog Sua ob tug phoojywg zoo tshaj, tham tsis tso tseg li.  Tsab nyob ntsiag to tsis hais ib lo lus li ces, ib pliag Sua thiaj li tias,

"Tus nus, koj puas yog Tsab ne yom? Koj puas nco qab kuv lawm? kuv twb yog tus uas nrog koj mus ua las voos rau hmo uas nyob pem Fresno State College na, koj puas nco tau lawm os?"

Tsab lub ntsej muag hnov kub lug tuaj, thiab pib sov nws ib ce zuj zus.  Nws txaj muag tias ua cas Sua tseem cim thiab nco tau nws zoo ua luaj li thiab.  

"Yog, kuv yog Tsab mas.  Es kuv xav tias, ntshe ntev li no lawm es koj yuav tsis nco qab kuv lawm no, koj tseem nco qab thiab los? Es Sua, ntu no koj ne, ho noj nyob li cas lawm thiab na?

"kuv ces, tseem nyob zoo li qub thiab xwb, tabsis mas hnub no es, kuv cov phoojywg peb sib yaum tias lam tuaj nuam yaj no es peb thiaj li lam tuaj nuam yaj uasi no ces ho ntsib nej xwb tiag."

"puas yog tiag ma?" Tsab teb ceev nrooj

"tiag mas" Sua teb loo rov qab

Nkawv tham lus twb tsis tau txaus lub siab, ces Ceeb twb los txuas nkawv lus tham mus lawm.  Ceeb txawm nug Sua tias,

"Sua, es ib tug hluas nkauj zoo nkauj ntxim hlub npaum li koj es puas tau muaj tus hlub ne yom?"  

"Tsis tau muaj li os, yog muaj lawm ces nyaj twb tsis tau tuaj ncig yuj yees rau ntawm tej no li os."  Sua teb rov rau Ceeb.

"Tiag li ntag?  yog li ntawd, puas yuav kam los ua peb tej hlub ne yom?"

"Kam kawg li mas, ntshe nej tsis nyiam peb es nej xyeej peb xwb laub, yog nej tsis xyeej ces, peb yeej tsis xyeej nej li thiab mas.  Es koj lub npe hu li cas ne yom tus nus? koj tsis tau qhia rau kuv nev..."

"oh, kuv hu ua Ceeb no os, Tsab wb yog phoojywg zoo heev li.  Es Tsab ho puas tau qhia rau koj ne lov?"  

"Tsab tsis tau qhia kuv os, tabsis mas txawm tias Tsab qhia kuv lawm los kuv yeej tseem yuav nug koj thiab hov." Sua hais luag nyav mus rau Ceeb.

Thaum no ua rau Tsab lub siab mob ib zag zag, tabsis mas Ceeb nkawv kuj yog phoojywg zoo lawm Tsab thiaj tsis tsa ncauj los hais ib los lus li cas rau Ceeb tias Tsab twb nyiam Sua ua ntej lawm.  Nws tsuas nyob ntawd, lub siab me lawm zuj zus xwb.  Ceeb thiaj li nug Sua tus xov tooj thiab Sua li chaw nyob.  Tsab ntsia ntsoov Sua sau rau Ceeb thiab cim zoo zoo Sua qhov chaw nyob cia rau nraub siab.

Thaum sau tag lawm, Tsab hais rau Ceeb tias,

"Ceeb, yog koj tsis xav li cas no koj mus hais Meej thiab es los peb mus tsev vim peb twb tuaj ntev lawm thiab es kuv tseem tshuav me ntsis study kuv yuav need to get it done."

"Tsab aw, ua cas es yuav mus maj ua luaj li ma?  Ua li mas, kuv mam li mus hais Meej los mas." Ceeb teb rov nrooj rau Tsab.

Ceeb mus hu Meej los txog ces, Tsab txawm hais rau Sua thiab Sua cov phoojywg tias lawv yuav tau mus tsev lawm vim tseem tshuav me ntsis hauj lwm.  



TO BE CONTINUE....
ua tsaug rau nej los nyeem txog txij no...thov tos nyeem ntxiv mus tom ntej no seb Tsab thiab Ceeb nkawv leej twg yuav yog tus tau Sua....
NCO kuv tsis PLOJ
NCO ntsoov kuv MOG
NCO kuv tag tiam NO


KhawsCia6Kuv Tag1SIM

#4
PAUB1zaugNCO1sim

PAUB1zaugNCO1sim

    Bachelor Degree 1

  • Members
  • 153 posts
Reputation: 1
Neutral
Hauv Tsab lub siab yeej tsis xav kom Ceeb los paub tau Sua kiag li tiamsis mas tamsim no qhov nws ua tau ces tsuas yog kav liam lawm xwb, vim nws kuj tsis xav kom txoj kev phoojywg plam vim tib tug hluas nkauj nkaus xwb.  Thaum lawv los txog tom Tsab tsev, Tsab thiaj li tawm thiab xa lus rau nkawv tag ces nws txawm nkag mus rau hauv tsev.  Los txog hauv nws hoob txaj nws txawm muab xaum thiab ntawv coj los sau Sua qhov chaw nyob uas nws tau cim tseg thaum tseem nrog Sua tham rau pem park ntawd cia.  Nws thiaj li sau tau ib daim ntawv muab xa mus rau Sua.  Hauv daim ntawv nws sau txog nws txoj me kev nco thiab nplooj siab uas twb nyiag nyiam Sua los lawm ntev txij li hmo uas tau nrog Sua ua las voos los lawm.  Nws muab daim ntawv tso rau hauv lub hnab ntawv ces nws txawm mus tso nkauj mloog.  

Tav lub sij hawm uas Tsab los txog tsev ntawd, Sua thiab nws cov phoojywg los twb puav leej los txog tsev lawm thiab.  Sua los txog tsev, nws kuj xav txog lub sij hawm thaum uas nrog Tsab thiab Ceeb nkawv tham tom park, cas zoo li kuj lom zem kawg nkaus li.  Sua niam los hais tias,

"Koj los lawm no ces los ua hmo noj los mas Sua."

"Aws niam, kuv mam li los ua mas."

Sua txawm mus rau tom txaj, mus hloov khaub ncaws tsuag tsuag, hnav ib lub ris luv, thiab ib lub tsho khuam, los ua hmo zoj zeeg rau ntawd rau lawv noj hmo tag nws txawm pib muab hmo ntsiag mus cia.  Nws lub cev lam ua hauj lwm fab fo, tiamsis mas hauv nws lub siab, tsuas xav ntsuj ntsoov txog Ceeb thiab Tsab tas li xwb.  Tsis paub xyov tus twg yuav zoo dua tus twg, cas zoo li nws kuj nyiam nkawv ob leeg thiab, tiamsis mas thaum yuav xaiv yuav hlub lawm, ntshe tsuas tau ib tug xwb.  Sua tu ub no tiav tag tom chav ua mov noj, nws thiaj nkag los rau hauv nws lub hoob txaj.  Tsis paub yuav ua zaj twg thiaj li yuav zoo nws lub siab, thiab thiaj yuav dhau lawm ib hmos xav.  Nws xav xav txog nkawv ob leeg, tsis paub yuav ua zaj twg, ces nws cia li mus pw ntxov ntxov lawm.

Kaj ntug tagkis tav li thaum 10 teev sawv ntxov xwb Ceeb twb hu xov tooj tuaj rau Sua lawm.  Sua niam teb tau ces thiaj li nqa lub xov tooj los khob Sua hoob txaj.  Sua qhib qhov rooj ces nws niam thiaj li muab lub xov tooj cev rau nws.  Sua txais loo mus tham xav tias ntxov ua luaj es yuav yog tus sim zeej twg nev....?

"Hello, leej twg os? Sua hais niag tsuag tsawv rau ntawm lub xov tooj.

"Kuv yog Ceeb os, koj puas nco qab lawm nas Sua?  Nag hmo koj muab koj tus xov tooj rau kuv na..."

"Oh, yog koj los Ceeb, cas koj yuav hu ntxov ua luaj tuaj li ma lov....hehehe?"

"Es koj tsis paub tias tos hu ntxov ua luaj li los, vim peb twb nco nco nkauj hmoob zoo li nej lawm los mas, es tsis kam los?"  Ceeb hais luag ntxhi rov qab rau Sua.

"Kam kawg mas, tabsis xav tias ntshe zoo li peb no xwb ces, nej twb tsis nco qab nco lawm no os..."

"Oh, txhob hais li ko ma Sua, txawm yog zoo li nej xwb es, peb thiaj li nco nco lawm los mas...hehehe...puas yog ma...? Es Sua, hnub no koj yuav npaj ua dabtsi nab yuam...?"

"Kuv tsis ua dabtsi thiab os, hnub no ces tej zaum nyob xwb, vim tias twb tsis muaj dabtsi tseem ceeb yuav mus ua es..."

"Yog li ntawd, Sua, yog koj tsis muaj dabtsi yuav mus ua no ces, kuv tuaj tos koj wb mus uasi os yom, puas yuav tau nab?"

"Ceeb, yog koj tsis xav li cas no, cia lwm zaus tso os yom, vim tias zoo li hnub no kuj tsis muaj dabtsi thiab tiamsis mas zoo li kuv tsis xav mus qhov twg li na..."

"Ua li mas Sua, yog koj tsis khoom thiab tsis xav nrog kuv mus uasi no los tsis ua li cas mas....es kuv nrog koj tham li no xwb nawb..."

Ces Ceeb muab lub xov tooj khwb nkaus rau lawm.  Sua xav zoj tias ua cas es Ceeb siab yuav mus luv ua luaj li.  Dhau li ces ib tagkis nws kuj tsis nco xav txog dabtsi lawm thiab.  Thaum uas txog li tav su dua lawm, Hnub tuaj saib Sua tom tsev.  Hnub muab tau ib daim ntawv rau Sua.  

"Yog leej twg sau na...?  Sua nug yam uas nws paub tsis tseeb.

"Xyov as, kuv xav mas tej zaum yuav yog Tsab no, vim tias Tsab yog tus muab rau kuv thaum uas nws pom kuv tom taj laj na.  Nws hais tias seb kuv puas kam pab nqa tsab ntawv no los rau koj, yog li ntawd, kuv thiaj li nqa los xwb."  Hnub teb rov qab rau Sua.

Sua luag nyav, xav hauv siab tias Tsab cov lus nws yuav hais li cas rau Sua.  Nws thiaj li muab tsab ntawv qhib coj los saib nyeem,

"Nyob zoo Sua, tus me neeg uas kuv nyiag nyiam tuaj nruab siab, thaum uas koj nyeem tsab ntawv no, thov koj xav rau hauv siab tias lub sij hawm no leej twg twb muaj siab rau koj los ntev lawm thiab xav ntsuj ntsoov txog koj txhua lub sij hawm.  Tsis paub xyov yuav hais li cas qhia rau koj, xav kom kuv yog tus uas paub koj nkaus xwb, los ua cas tsis zoo li lub siab xav. Kuv paub tias kuv tus phoojywg nyiam koj lawm thiab, yog no kuv thiaj li xav tias lam sau tsab ntawv no tuaj qhia rau koj paub tias kuv los kuj nyiam koj lawm thiab.  Es Sua, kuv tsuas lam nug koj tias, hauv koj lub siab koj nyiam leej twg dua nab?  hehehe, tsis tsim nyog kuv yuav hais li no rau koj li, tabsis mas kuv nyiam koj heev li es, kuv thiaj xav paub tias, hauv koj lub siab puas lam yuav muaj kuv ib qho me me thiab os lov...kuv lus tsuas muaj li no xwb, es nyob zoo koj mog leej muam Sua tus kuv twb nyiag nyiam los lawm ntev...Sau npe, Tsab."

Sua muab tsab ntawv rov qab tais cia thiab nws txog ib zag siav ntev tsawv...tsis paub yuav xav zaj twg thiaj li zoo.  

"Sua, yog ua li cas lawm na, cas koj nyeem tag tsab ntawv xwb, koj cia li ntsiag to lawm na?"

"Tsis muaj dabtsi os Hnub. ua tsaug koj tseem pab nqa daim ntawv no los rau kuv nawb.  koj puas los tom kuv txaj es wb tham os lov...."

"Sua, kav liam mas, kuv twb tuaj ntev lawm thiab ces, tej zaum kuv yuav rov qab mus tsev. Cia ib tsam yog tias kuv muaj sij hawm no kuv mam li hu phone tuaj nrog koj tham nawb...."

Ces Hnub txawm tawm los mus lawm.  Sua niam thiaj li los hais rau Sua tias,

"Es Hnub tuaj es neb yuav mus uasi los Sua?"

"Niam, tsis mus os, Hnub lam tuaj saib kuv xwb."

Sua txawm sawv ntawm xaus loos los mus rau tom nws hoob txaj lawm.

****

TO BE CONTINUE....
NCO kuv tsis PLOJ
NCO ntsoov kuv MOG
NCO kuv tag tiam NO


KhawsCia6Kuv Tag1SIM

#5
PAUB1zaugNCO1sim

PAUB1zaugNCO1sim

    Bachelor Degree 1

  • Members
  • 153 posts
Reputation: 1
Neutral
Ua cas ib ntsais muag xwb, twb yuav txog lub caij rov mus kawm ntawv.  Sua, thaum uas nyeem tag Tsab daim ntawv uas Hnub nqa tuaj rau nws los txog tav li lub sij hawm no, Sua twb tsis nco xav txog Tsab thiab Ceeb nkawv li lawm.  Ceeb los, tsis tau nrog Sua mus uasi rau thaum lub sij hawm uas nws hu tuaj rau Sua ntawd, ces nws txawm cia li tsis hu Sua li lawm thiab.  Tabsis mas Tsab, Tsab tseem pheej sau ntawv tas zog tuaj nug Sua moo yam tsis tu ncua.  Muaj ib hnub Tsab thiaj li sau ib tsab ntawv xa tuaj rau Sua tias lub week tom ntej Tsab yuav tuaj coj Sua mus uasi rau thaum sawv ntxov, es kom txog rau hnub ntawd, Sua txhob mus qhov twg es npaj tos Tsab tuaj xwb.  Thaum xa daim ntawv ntawd mus rau Sua, tsis ntev, tos nco xwb twb txog lub sij hawm Tsab hais tseg rau Sua lawm.  Hnub ntawd, Sua tu cev du dais tos Tsab.  Sua hais rau nws niam tias,

"Niam, hnub no kuv yuav mus uasi ib chim es kuv mam li los tsev nawb."

"Ua li mas, es koj nrog leej twg mus uasi na?"

"Niam, kuv nrog Tsab mus uasi os."

"Es Tsab twg na, cas kuv tsis tau hnov koj hais txog nws li ma."

"oyo kuv niam mas." Sua teb luag nyuj nyav. "Tsab yog ib tug tub hluas hmoob kuv nyuam qhuav paub tsis ntev xwb mas. Cia ib pliag nws tuaj txog seb, koj puas pab nyiam nws thiab ov."

"Ua li mas me ntxhais, yog mus uasi no ces, txhob mus lig lig nawb, txog caij los yuav tsum los tsev nawb."

"Aws niam."

Thaum uas Tsab tuaj txog ntawm Sua tsev, Tsab los thiaj los khob khob qhov rooj.  Sua twb yeej pom Tsab los sab nrauv los lawm, nws thiaj li khiav khiav los qhib plho lub qhov rooj.  

"Tsab, koj tuaj txog lawm los?"

"Aws, tuaj txog lawm mas....WOW, cas es hnub no koj yuav nrog leej twg mus uasi es, cas yuav tu cev tau zoo nkauj ntxim hlub ua luaj li na yom..." Tsab hais luag nyav rau Sua.

"oyo koj mas, twb yog nrog koj mus uasi xwb nev, es yog tsis yog nrog koj es tseem yuav nrog leej twg thiab na."

Ces Sua thiab Tsab nkawv txawm tawm mus rau tom Tsab lub tsheb ces Tsab txawm coj Sua mus uasi nyob rau tim Yosemite National Park.

"Koj niam twb kam koj mus lawm los Sua?"  Tsab tsa ncauj los nug

"Kuv niam kam lawm mas, yog koj tsis ntseeg, koj mam li rov mus nug kuv niam dual os yeej tau mas...." Sua teb luag nyav rov qab.

"Tau lawm os, yog koj niam yeej kam tiag lawm no ces, tsis mus nug dua lawm tsam ces tsis txawj nug ces nug nug ua rau koj niam tseem haj yam tsis kam lawm thiab ces ntshe kuv yuav kawg quaj li lau."  Tsab tso dag me me rov qab rau Sua.

Nkawv tham tham thiab tso dag tso luag uasi tos nco xwb nkawv twb mus txog rau Yosemite National Park lawm.  

"Sua, kuv coj koj wb mus rau puag saum Glacier Point yom.  Puag sauv mas, ntsia pom roob pom hav haj yam zoo nkauj heev li laiv."

"aws, ua li mas, kuv los kuj xav mus pom roob pom hav thiab seb puas yuav zoo nkauj npaum li koj hais thiab ne yom..hehehe..."Sua teb rov qab.

Thaum uas nkawv mus txog rau sauv, pom me toj roob hauv pes laim ua ntxhee yees, me cua tuaj laj ntxiag, thiab pom dej tsaws tsag ntws poob tau zoo nkauj heev li.  Hnov me kab me noog quaj zom pes zaws, hos neeg los kuj tuaj coob kawg nkaus li thiab.  Sua thiab Tsab nkawv los zaum rau ntawm ib lub pob zeb ntsia rov rau tus dej tsaws tsag, ces Tsab txawm cev nws sab tes los mus tso rau ntawm Sua lub xwb pwg thiab rub Sua los ze zog rau ntawm nws lub xub ntiag.

"Tsab, koj ua dabtsi li ko na?"

"Ab Sua, kuv xav tias twb yuav txog lub caij uas koj yuav rov mus kawm ntawv lawm es ua rau kuv xav tias yog koj rov mus kawm ntawv lawm ntshe kuv yuav nco koj heev li xwb.  Vim sij hawm sib ntsib yuav tsawg zog lawm no na. "

"Tsab, kuv tsis xav kom koj yuav muab thaj chaw no coj los ua ib qho chaw nco rau kuv na.  thiab tsis tas li xwb, kuv tsis xav kom muaj ib hnub twg kuv yuav tau nyob ib leeg ntsiag to li lub roob no es tsis muaj leej twg pom thiab paub tias kuv txoj kev hlub no mob npaum li cas no los?"

"Sua, txawm tias wb tsis tau uake ntev los, tsis txhob muab xav deb deb rau tej yam ko mas los.  Ntev li no lawm kuv lub siab twb xav ntsuj ntsoov txog koj lawm xwb, twb tsis qab siab yuav xav txog dabtsi li lawm.  Kuv thov koj ntseeg kuv lub siab yom, es ho qhib siab rau kuv thiab, puas yuav tau os?"

Tsab rov muab nws txhais tes los mus tso rau ntawm Sua lub xwb pwg, zaum no Sua tsis hais li cas lawm, nws nyob ntsiag to thiab cev nws sab tes los mus tuav Tsab cov ntiv tes ruaj ruaj lawm xwb.

"Sua a, koj puas paub tias txij li thaum uas kuv nrog koj mus ua las voos tag los, kuv tsuas xav ntsuj ntsoov txog koj tas li xwb.  Koj puas paub li thiab puas yuav ntseeg tau tias tus neeg zoo li kuv no, twb nyiag nyiam thiab xav hlub koj los lawm ntev no nab?"

"Tsab aw, koj lub siab es, kuv yuav ua cas paub na los.  yog tias muaj npaum li koj hais rau kuv ko ces, kuv kuj zoo siab xwb mas.  Kuv ntshai tsam tsis muaj npaum li koj hais ko es koj tsuas yog lam hais dag kuv xwb laub. puas yog na?"

"Sua, kuv yeej tsis lam tau lam dag koj li os.  Hauv kuv lub siab, muaj li cas kuv yeej hais li ntawd xwb, es vim hauv kuv lub siab no yeej nyiam thiab xav hlub koj tiag, es kuv thiaj li hais li mas.  Es hauv koj lub siab, puas tseem yuav muaj ib qho chaw seem rau kuv nyob rau hauv thiab nab los?

"Hauv kuv lub siab no, yog koj tsis dag ces, kuv yeej muaj chaw rau koj nyob txhua lub sij hawm li os Tsab.  Es yam uas koj hais tau, koj puas yuav hlub tiag ma los?  Yam koj nyiag nyiam, koj puas yuav xav tau tiag ma los?"

"Yog kuv tsis xav tau, ces kuv twb tsis hais npaum li no li os Sua, puas yuav kam kuv los nyob hauv koj lub siab tiag tiag ma lov?"

"Kam kawg mas Tsab, kuv kam kawg li os, vim tias, nyob hauv kuv lub siab, twb yeej nyiam koj los ntev lawm thiab, es tseem pheej tos ntsoov seb koj puas yuav muaj siab tiag rau kuv thiab xwb."

"Tiag lov Sua?"

"Aws, tiag mas."

Tsab zoo siab heev dhau, nws khoov loo los muab Sua kawm ruaj ruaj rau hauv nws lub xub ntiag, thiab hnia loo Sua ib pas ntawm Sua daim di ncauj.  Sua luag nyav thiab tsa ncauj los hais tias,

"Tsum ma, koj tsis txaj muag los?  Muaj neeg coob coob nyob ntawm tej no na...."

"Ab, twb tsis muaj neeg nev, kuv twb tsis pom muaj leej twg ne, tsuas yog wb xwb sav."

"es tsis muaj neeg los, muaj tej me nroj tsuag ne. Neeg tsis pom los, tej me nroj tsuag pom ces txaj muag xwb..."

"es nroj tsuag xwb los koj txaj muag thiab los Sua?  

"hehehe...txaj muag thiab hos...." Sua teb luag nyav rov qab rau Tsab

"Sua, kuv coj koj wb ho nqis mus saib dej seb yom, koj puas kam na?"

"Sure, tau kawg mas."

Tsab thiab Sua nkawv thiaj li nqis saum roob los mus rau nram kwj ha, los mus saib dej ntws tau tus yees thiab zoo nkauj heev. Dej ntshiab si xwb.  Nram kwj ha, me cua tuaj laj ntxiag thiab kuj ho txias zias.  Nkawv ob leeg hle khau thiab taug kev raws ntug dej.  Nkawv taug kev los txog rau ntawm ib lub pob zeb ntawm ntug dej, ces nkawv txawm los zaum rau ntawd.  Nkawv zaum ntawd ib chim zoj, cas pom ib pab ntses los ua luam dej ze rau ntawm lub pob zeb uas nkawv zaum.  Nkawv ob leeg ntsia cov ntses ua luaj dej tsis tso tseg.  Sua thiaj tsa ncauj los hais rau Tsab tias,

"Tsab, kheev lam wb txawj txia es sim txia ua ob tug ntses nrog cov ntses no sib tw ua luam dej, es seb wb puas yuav mus pom tag lub me qab thu seb, nws ho yuav loj thiab dav npaum li cas, thiab seb nws ho puas zoo nkauj npaum li nyob rau saum nroob qhuab no thiab ne yom..."

"Sua, yeej yog los mas, tabsis mas yog tias wb txia tau mus ua ntses lawm ces tsam luag tuaj nuv, es ho tseem nuv tau koj los yog kuv mus lawm thiab ne.  Thaum no, wb ib leeg ho yuav tau ncaim ib leeg mus ib qho, tsam kuv ho raug coj mus hau noj, los sis koj ho yog tus raug hau noj nev...hehehe...ces haj yam tsis tau uake ntag lau..."

"hehehe...Tsab, cas koj yuav hais tau tas lauv ua luaj li ma...tabsis mas ntshe yeej yog thiab ho yom.  Ua ntses tsam ib tug rau nuv lawm, ua noog ya tsam ib tug ho rau tua lawm.  Hos ua me kab me kooj los tsam ib tug ho rau noj lawm, hos ua me huab me cua los ntshe yuav sib tw ya thiab xwb.  kav liam lau kawg rov qab ua wb xwb mas yom...hehehe..."

"yog mas Sua, kawg rov qab ua wb xwb, es kuv thiaj li tau puag koj rau hauv kuv lub me xub ntiag no mus tag ib sim os yom..."

Tsab hais li tas nrho, nws txawm rub kiag Sua los puag rau hauv nws lub xub ntiag.  Sua tsis hais ib los li, nws kuj txav los nyob rau hauv Tsab lub xub ntiag yam zoo siab hlo thiab.

"Sua, hnub no es koj puas lom zem thiab os lov?"

"humm, kuv lom zem heev li os, ua tsaug uas hnub no koj tseem tuaj coj kuv nrog koj tuaj mus uasi li no thiab, kuv lom zem tshaj li os."

Tsab thiab Sua nkawv txawm sawv ntawm lub pob zeb uas nkawv zaum ntawd, ces nkawv txawm sib tuav tes taug kev raws ntug dej dua.  Nkawv taug taug ib chim ces, Tsab txawm khoov loo mus kov kov dej, ces txawm ib ntov dej tuaj rau Sua ua rau Sua ntsej muag ntub dej tag.  Sua txawm khoov loo mus tib ntov dej rov tuaj rau Tsab ua rau Tsab los kuj ntub dej tag lawm thiab.  Ces nkawv txawm tso loo tes sib caum ntov dej ntawm tus ntug dej ntawd.

"Tsab a, yog koj caum tau kuv no, kuv mam li cia koj hnia kuv ib pas dua os...!"

"Tiag lov Sua!"

"Tiag mas, caum nawb, seb caum puas tau ov...."

Sua hais li tag nrho, nws tso sas ntws khiav ceev ceev raws ntug dej nqis hav lawm.  

"Khiav kom tiag nawb Sua...! kuv tuaj lawm ov...!"

Tsab tos Sua khiav zoj ib me pliag ces, Tsab raws loo qab.

"Tuaj lawm nawb...!"

Sua tig saib zoj Tsab khiav tuaj lawm tiag, Sua rov tso sas ntws khiav ceev ceev dua.

Tsab raws zoj ib me pliag xwb, twb tsawv nkaus tau Sua sab tes, ces nws thiaj muab Sua rub kiag los puag zoj rau hauv nws lub xub ntiag.  Nws plam loo taw ces nkawv ob leeg ntog loo mus rau hauv dej ua rau nkawv ob leeg ntub dej tag.  Nkawv ob leeg luag nrov nrov tsis nco qab txaj muag tias tsam tej neeg dua kev ho yuav xav li cas los yog ho ntsia nkawv.  

"txhom tau lawm laiv, puas yuav cia kuv hnia ib pas ma lov?"

"txhom tau lawm ces, kawg tau cia koj hnia ib pas xwb..." Sua teb rov qab rau Tsab.

"tiag lov, kuv hnia kiag ib pas tiag laiv...ummm, cas koj yuav tsw qab ua luaj li...thiab ntxim hlub tag npaum li na lov..."

"txhob dag dag ma Tsab, cas koj yuav txawj dag ua luaj li lawm thiab na lov..."

"tiag mas Sua, koj mas, zoo tag ib puas tsav yam li lawm tiag hov..."

Tsab khoov loo mus hnia Sua daim di ncauj.  Sua los kuj hnia loo Tsab rov qab thiab.  Nkawv ob lub qhov ncauj txawm sib txais mus sib hnia tsis tso tseg.  Thiab tsis nco qab txaj muag rau leej twg li lawm.  

Cas nkawv nyob zoo li kuj yog ib hnub lawm thiab, tiamsis rau nkawv, zoo li twb tsis tau ntev thiab sav, cas hnub txawm siv pib qaij lawm.  

"Eb Tsab, cas kuv tseem nrog koj nyob twb tsis tau txaus kuv lub siab li, es sij hawm txawm siv yuav tag lawm.  Cas kuv tseem xav xav nrog koj nyob li os."

"Yog mas Sua, kuv los ib yam li thiab os.  Xav kom lub hnub tsis txhob txawj poob, lub ntiaj teb no tsis txhob txawj tig, es cia hnub no nyob mus ib sim, es cia koj nyob nrog kuv mus ib txhis ma yom..."

"Tsab a, ib hnub no lawm es, koj xav li cas rau kuv xwb nab?"

"Es koj yuav kom kuv xav li cas ma Sua?  Ib hnub no lawm los twb tseem tsis tau txaus kuv lub siab li na. Sua, kuv nyiam koj lawm.  Kuv lub siab no hlub koj lawm...koj puas yuav lees txais os?"

"Tsab, kuv lees kawg mas, kuv twb tos koj lo lus ko los ntev heev li lawm os....Tsab, Kuv hlub koj thiab os...."

Hnub twb pib qaij pom liab plim rau tim qab ntug, ces Tsab thiaj li coj Sua rov los mus tsev.  Thaum los txog rau tom Sua tsev, Tsab ntsia Sua mus nkag rau hauv tsev lawm ces Tsab thiaj ua ib siab rov los mus tsev lawm....


TO BE CONTINUE...

Thov tos nyeem ntxiv mus rau tom ntej no seb Tsab thiab Sua nkawv ho yuav mus tau zoo li cas...
Ua tsaug...
NCO kuv tsis PLOJ
NCO ntsoov kuv MOG
NCO kuv tag tiam NO


KhawsCia6Kuv Tag1SIM

#6
PAUB1zaugNCO1sim

PAUB1zaugNCO1sim

    Bachelor Degree 1

  • Members
  • 153 posts
Reputation: 1
Neutral
Txij li thaum uas Tsab thiab Sua nkawv sib paub tom tsev kawm ntawv es tau mus ua las voos los txog los rau thaum nkawv tau tsim muaj txoj kev sib hlub, zoo li twb tsis ntev thiab tos nco twb tau 2 xyoos lawm.  Nkawv txoj kev sibhlub tseem nyob ruaj nress li qub.  Sua twb kawm tag college lawm thiab nrhiav tau hauj lwm zoo ua lawm.  Hos Tsab los kuj ua hauj lwm lawm thiab xwb.  Nyob rau 2 xyoos hauv nkawv txoj kev sib hlub no, Tsab tsev neeg lawv twb kuj tau tsiv tawm hauv zos Fresno mus rau pem Sacramento lawm.  Tseg Sua thiab nws tsev neeg thiaj tseem nyob rau hauv Fresno xwb.  Txoj kev sib ncaim tawm zos li no, nyias ua nyias hauj lwm thiab, txoj hau kev los kuj deb, ua rau nkawv tsis tshua muaj sij hawm tuaj mus sib ntsib txhua hnub li yav tag los lawm.  Tsuas yog rau Vas xaum Vas thiv ntau lawm xwb.  Kawm ntawv tag li no, Sua thiab nws cov phoojywg, nyias kuj mus nyias ib qho lawm.  KabZuag twb tau tsiv mus rau yav qaum teb Wisconsin lawm, hos Hnub twb tau mus yuav txiv lawm.  Tshuav Sua, tseem pheej niam hnub tos ntsoov Tsab xwb.  Txoj kev tsis muaj phoojywg tsis tau chaw mus tauv pem, mas yog ib txog kev uas kho siab kawg nkaus rau ib tug neeg tseem tsis tau muaj lub neej.  Ua cas lub caij lub nyoog tsuas muaj dhau mus lawm zuj zus xwb, raws tsis cuag.  Txhua yam pauv tag tsis zoo li 2 xyoos dhau los.  Muab xav txog mas cas zoo li npau suav lawm xwb tiag.  

Muaj ib hnub tav su, Sua ntsia nraum zoov pom tus neeg xa ntawv tuaj xa ntawv.  Sua txawm seev zoj tias,

"eb, hnub no es nim tshav ntuj lis nrig, hnov me suab kab noog quaj zom pes zaws, es tus neeg kuv hlub nws puas xav txog kuv thiab ne?  kheev lam nws xav txog thiab es nws sau ntawv tuaj rau kuv thiab ma...."

Thaum tus neeg xa ntawv mus dua toj lawm, Sua thiaj tawm mus muab cov ntawm raum lub npov los.  Nws muab saib saib cas nyob rau ntawm pawg ntawv uas nws tuav ntawd, muaj ib daim yog Tsab sau tuaj rau nws.  Nws lub ncauj tsis haus, nws luag li nyav thiab zoo siab heev tias, cas seev seev es lam raws nkaus txoj me kev seev.

Nws nqa cov ntawd coj los cia rau hauv tsev, ces nws txawm nqa Tsab daim ntawv mus zaum rau nraum zoov ces thiaj muab qhib coj los nyeem.  Thaum muab nthuav zoj los nyeem, nws luag ntxhi, ke nyeem ke luag, zoo siab dhau heev lawm tsis nco faj xav txog dabtsi li...hauv tsab ntawv sau tias,

"noj qab nyob zoo nco txog Sua tus neeg kuv hlub dua ntais...koj nyob li cas lawm xwb?  Thaum nyeem tsab ntawv no lawm, thov kom koj tsuas muaj kev zoo siab nyob luag ntxhi xwb mog."

Thaum no Sua rov qab luag ntxhi thiab xav zoj rau nws lub siab tias,

"eb Tsab, cas kuv yuav nco koj ua luaj li no, es thaum twg koj mam li tuaj coj kuv mus nrog koj nyob es thiaj tsis kho siab khuav li no lawm os..."ces nws rov mus nyeem daim ntawv dua...

"Sua, kuv xav qhia ib yam dabtsi rau koj, tiamsis tsis paub yuav pib tog twg tuaj.  Tsis qhia los yuav ntxoov ntxoov kuv lub siab yam li tsis muaj ib qho chaw kaj.  Tab txawm kuv rau koj lawm los, ntshe yuav haj yam ua mob rau hauv kuv lub siab ces ntshe yuav haj yam tsis kaj thiab.  Tabsis li cas los, kuv paub lawm hais tias, ntxov tsis lig, yeej yuav tau qhia koj paub, yog no kuv yuav qhia rau koj tias nyob rau lub teb chaws no, tej laus yeej yuam tsis tau yus li los mas, tiamsis mas tej laus laug tsuas xav kom yus tau lub neej zoo thiab muab txoj kev cia siab los cog rau yus tus ua tub kom coj tau li luag lub siab ntshaw."

Thaum no Sua nres zoj ib pliag, nws lub siab nyias zog tias cas Tsab lam hais li ntawd.  Es yog li cas tiag...Nws thiaj rov mus nyeem tsab ntawd dua...

"kuv txiv thiab kuv niam nkawv tau hais tias nkawv xav kom kuv yuav kuv niam tus dablaug tus ntxhais.  thiab dablaug tus ntxhais los kuj nyiam kuv heev thiab.  yog qhia koj qhov tseeb, ces dablaug ntxhais yeej nyiam kuv puag thaum ub uas kuv tsis tau paub koj lawm, tabsis nim no li cas los kuv twb paub koj lawm thiab koj yog tus sawv nraim rau kuv nruab siab txhua lub sij hawm.  lub sij hawm no kuv nyuaj siab kawg li tsis pom qab yuav ua zaj twg.  yog wb txoj hmoo yeej xeeb los ua txij ua nkawm tiag, ces sim neej no kuv yeej yuav hlub koj ib leeg xwb os Sua.  Tabsis mas kuv niam lawv ho yug tsis muaj pes tsawg tus tub, es kuv kuj ho ntshai tsam lawv tusiab thiab, es thiaj nyuaj nyuaj kuv siab tsis paub yuav xaiv txoj hau kev twg..."

Sua ke nyeem Tsab daim ntawv, lub kua muag ntws si tawm los, tsis paub yuav hais zaj twg li lawm.  Nws rov ua tiag nyo hau mus nyeem kom tag...

"Sua, kuv paub tias koj yeej tusiab rau kuv heev li lawm tabsis mas thov koj txhob quaj los lub kua muag mog Sua.  So koj lub kua muag thaum uas koj nyeem tsab ntawv no, vim kuv tseem nyob deb es yuav so tsis tau koj lub kua muag es kuv tus me Sua tsis txhob xav ntau ntau nawb. Nov tseem yog ib tsis ntse xwb tsis tau yog pes tsawg tsis ntse kev, es kuv lub siab tseem nyob nrog nraim koj xwb mog.  Yim sau ntau, yim yuav ua rau kuv nco koj thiab lub kua muag ntws los xwb, yog li no kuv tsuas muab tsab ntawv no los xaus li no xwb mog tus neeg kuv hlub... es nyob zoo koj nawb...Sau npe, TSAB."

Sua muab daim ntawv tais twj ywm cia rau hauv lub hnab ntawv.  nws lub kua muag ntws si tawm los, tsis muaj ib tug phoojywg li lawm thiab, tsis tau kev mus quaj rau leej twg.  Ntshe yuav quaj twj ywm rau lub siab, yuav ntshai ruj rwg twj ywm rau nruab siab tias tsam tiam no yuav plam tus neeg yus hlub es cas nws thiaj tsis paub tias hlub nws npaum li cas.  Nws tawm mus ncig rau tom ib lub chaw uasi ze rau ntawm lawv tsev. Nws mus zaum rau ntawm ib lub viav vias, maj mam thawb nws tus kheej fiav mus fiav los ua kua muag ntws si....ib pliag nws thiaj seev tawm tias,

"eeebbbb, KabZuag thiab Hnub, ua cas nej muaj hmoo es nej nim ib tug mus nyob ib qho, nyias mus nrhiav nyias txoj kev hlub, nyias mus muaj nyias ib lub neej es yuav tseg kuv nyob ib leeg twm zeej tsis muaj phoojywg, tsis muaj chaw mus khiav mus quaj os nkawv.  Cas nim no es, kuv yuav saws tau txoj me kev lwj siab quaj dhi tsis muaj neeg nrog kuv hnov, tsis muaj neeg nrog kuv pom, es cas kuv yuav tusiab ua luaj li no os KabZuag thiab Hnub e.  Cas kuv yuav nyob yam li tus neeg tsis muaj neeg ntshaw, es tsis muaj neeg nrog luag ua es kuv yuav tsis paub muab kuv lub neej txoj kev nyuaj siab kho siab no coj mus tham qhia rau leej twg es ntshe yuav muab seev nrog huab nrog cua tshuab tuaj rau neb es seb puas paub kho neb siab es seb neb puas yuav paub tias sij hawm no kho kuv siab ua luaj li no os nkawv..."

Sua cev tes los so nws lub kua muag uas ntws los rau ntawm nws daim di ncauj tag ces rov seev lo zoj tias,

"eebbb, cas txoj kev phoojywg thiab txoj kev hlub ziag no yuav zoo li npau suav lawm xwb tiag.  Ua cas txhua yam yuav pauv tag pauv tau sai ua luaj es zoo li ib ntsais muag lawm xwb.  Tsab aw, cas koj yuav siab dub ua luaj, tsis hlub tiag, kuj tsis txhob dag kuv lub siab no tuag nco koj ma, cas nim no es kuv lub siab cog tag nrho rau koj lawm xwb, es kuv yuav ua li cas ua neeg nyob yog kuv tsis tau koj tiam me neej no os?"

Sua yim xav, yim tusiab thiab tsis paub yuav ua zaj twg thiaj nplij tau nws lub siab.  Nws rov muab Tsab daim ntawv nthuav coj los saib.  Yim saib yim los kua muag, tsis paub yuav ua li cas rau es lub siab thiaj li yuav nqig thiab.  Nws thiaj xav zoj tau tias, mus tsev tso mus sau ntawv teb Tsab daim ntawv no es nws yuav hais tag hauv nws lub siab tshua rau Tsab seb puas yuav daws tau nws txoj me kev tusiab.  Nws thiaj li sawv tsees ntawm viav vias mus tsev lawm.  

Thaum nws los txog tsev, nws ncaj qha nkag rau hauv nws hoob txaj, kaw nkaus qhov rooj, ces thiaj rov muab Tsab daim ntawv nthuav tso rau ntawm nws lub rooj saib ntawv.  Nws muab tau ib tug mem thiab ib phau ntawv los yuav npaj sau mus teb Tsab cov lus...Thaum nws sau tag, nws thiaj li muab tais tso rau lub hnab ntawv, tso chaw nyob thiab tso lub "stamp" rau ces muab xa mus lawm.

*****

Tsab tus kheej, tsis paub xyov yuav ua zaj twg thiaj li zoo. Ncig mus ncig los hauv nws hoob txaj zoo li tus neeg vwm tsis paub yuav xav txog dabtsi li lawm thiab.  Nyob rau hauv nws lub neej, nws muab uasi heev dhau lawm tsis nco qab txhawj xeeb txog dabtsi, tsis nco qab txhawj xeeb txog lub neej pem suab.  Tsam no tsis paub xyov yuav xaiv txoj hau kev twg taug thiaj li yuav zoo.  Txawm tias nws hnub yug twb loj li no lawm los, nws yeej paub tias nws yeej cam tsis dhau nws niam lawv, tus uas nws cam tsis dhau kiag mas yog nws txiv.  Txawm tias nws yuav mus ua loj leeb npaum li cas los, nws yeej mloog nws niam nws txiv lawv hais ib txhia thiab.  Tabsis zaum no yog zaum uas nws yuav tau xaiv tias yuav cam kom dhau niam txiv los yuav yuav li niam txiv hais.  Yog nws yuav li niam txiv hais, ces yuav ua rau Sua tusiab rau nws.  Yog nws xaiv Sua, ces yuav ua rau nws niam thiab txiv yuav chim rau nws heev.  Tsis paub yuav ua zaj twg li, lub siab kuj hlub Sua kawg siab kawg ntsws, tiamsis ib lub siab ho ntshai niam thiab txiv chim thiab tusiab rau nws thiab.  

Xav ntau ntau mob tob hau, nws thiaj tawm mus ncig uasi rau tom park lawm.  Mus taug kev uasi pom tej khub hluas nkauj hluas nraug tuaj mus uasi sib tawb luag nyuj nyav, ua rau nws kuj npau taws thiab rov chim rau nws tus kheej.  Pom tej ntawd ua rau nws nco txog Sua thiab txhua lub sij hawm uas tau nrog Sua uake zoo li lub hnub twb tsis ntev kiag li.  Nws kuj tsis chim rau qhov uas nws niam lawv kom nws yuav dablaug tus ntxhais, vim nws yeej paub tias dablaug tus ntxhais los kuj nyiam nws heev, thiab nws los kuj xav tias dablaug tus ntxhais kuj zoo tau ntxim siab thiab, tabsis tsuas yog tias tsis tau ntaus txoj kev nkauj nraug li xwb.  Nws ncig ncig ntev loo ces nws thiaj li rov los tsev.  Thaum nws los txog ntawm tsev, nws thiaj mus tom lub npov xa ntawv, nws qhib saib no pom Sua tsab ntawv nyob hauv, nws thiaj muab nqa los mus rau hauv nws hoob txaj.  Thaum txog hauv txaj, nws lub siab haj yam xav tau ntau yam tias cas Sua kuj teb rov tuaj sai kawg li, es lub siab xav ruj rwg tias xyov Sua yuav hais phem los hais zoo...nws xav xav thiaj muab qhib los nyeem...

"Nyob zoo Tsab...kuv tsis tusiab dabtsi li os.  Kuv tsuas muaj nrog koj zoo siab xwb.  Txoj kev hlub nyob hauv lub qab ntuj no ces peb txhua leej yeej yuav tsum muaj txoj kev tusiab, nyuaj siab, thiab khosiab ua ntej peb thiaj yuav paub txog txoj kev sib hlub tias nws muaj nqis npaum li cas rau yus.  Tsuav koj mloog koj niam koj txiv lus, es mus tau lub zoo neej ua xwb ces kuv yeej nrog koj zoo zoo siab tsis txawj tag li os.  Ntawm koj thiab kuv wb, tsis hais los kuv yeej paub tias ntshe yuav mus tsis taus. "

Tsab ke nyeem, nws lub siab ke xav ntau yam ua rau nws lub plawv dhia pig poog zoo li yuav dhia tawm los li.  Hauv nws lub siab mob ib zag zag ntshe tias tsam Sua yuav ua ib siab tso nws tseg.  Nws lub siab yuj li plaws xav mus cuag Sua tam sim ntawd lawm xwb.  Nws muab daim ntawv zuaj ruaj ruaj rau hauv xib teg, ces ho rov muab nthuav rov coj los nyeem dua...

"Ua neeg nyob tsis hais koj los yog kuv, peb leej niam leej txi yeej xav kom peb tau lub neej zoo xwb.  Tabsis mas yus ho pheej xav tau tus neeg uas yus hlub thiab xaiv tseg cia xwb es thiaj pheej tsis xav ua raws li niam txiv hais.  Tabsis koj yuav tau yuav li koj niam lawv hais es koj lub neej thiaj zoo nawb Tsab.  Txawm koj yuav xaiv txoj hau kev twg los kuv yeej nrog koj zoo siab.  Yog koj xaiv kuv los kuv kuj zoo siab tias kuv hmoov kuj raug koj, yog koj ho xaiv nws lawm los, kuv kuj ua ib siab xav tias ntshe kuv hmoov tsis raug koj no xwb os...Yog wb muaj txoj hmoo los ua txij ua nkawm tiag, ces kuv yeej yuav tswj txoj sia tos koj ib leeg xwb mog.  Yog tias wb hmoov ho tsis txog los kuv tsuas muaj foom kom tus neeg kuv hlub li koj tsuas mus ua lub neej tshav ntuj nrig xwb ces kuv zoo siab lawm.  Cia wb tsis txhob cia lub kua muag poob, thiaj tsis tsim ib txog kev nco lwj ntshis rau wb nruab siab es yuav raws wb mus kom tag lub neej no mog.  kuv tus me neeg zoo, txhob xav ntau ntau mog, nco ntsoov tias tiam neej no kuv tsuas hlub koj ib leeg xwb, txoj hau kev koj xaiv, kuv yeej tsis tusiab rau koj li.  Hauv kuv lub siab, yeej cog rau koj ib leeg xwb mog Tsab....Sau Npe, Sua."

Tsab nyeem tag, nws lub kua muag ntws twj ywm, paub tau hauv nws lub siab tias Sua yeej tu tusiab heev li lawm thiab.  Lub ncauj hais tau li Sua cov lus hais los, Tsab yeej paub tias Sua lub siab yeej quaj dhi xwb.  Nws muab Sua tsab ntawv rov tais tso rau hauv hnab ntawv ces nws hais rau nws tus kheej tias,

"Sua, txawm yuav zoo li cas los, hauv kuv lub siab tiam no hlub koj xwb....thov qhia kuv seb yuav ua zaj twg thiaj li zoo os lov..."

Xav zaj twg los cas mob siab ua luaj, tsis paub yuav ua li cas li lawm tiag.  Ib hnub dhau mus lawm zuj zus, Tsab tsis teb Sua tsab ntawv rov mus rau Sua.  Lub phone los Tsab twb tsis khaws los hu rau Sua li thiab.  Ib hnub dhau mus ua ib hlis, ib hlis dhau mus ua ob hlis peb hlis zuj zus lawm.  Hauv Tsab lub siab, xav ntau ntau ces nws cia li kav liam, tsis xav yuav xav txog dabtsi li lawm.  Xav tias cia nyob hnub dhau hnub, yog hu mus nug txog ces, yuav ua rau nws nco nco Sua heev xwb.  Cia tseg ib ntus seb, Sua ho puas yuav tseg tau nws, nyaj tseg ntev, yog Sua ntsib tau tus tshiab, tej zaum nws kuj yuav ua tau ib siab tsis nco Tsab lawm thiab.  Tseg thiab tseg, ces cia li pheej tseg ncua moo lawm.  Tiamsis mas hauv nws lub siab, yeej xav ntsuj ntsoov txog Sua xawm mawm thiab....

*****

Twb tau 4 hlis ntau uas Tsab tsis nug Sua moo lawm.  Tsab mus uasi ib hnub los txog tsev, nws txiv hais tias,

"Tsab, los nov kuv nrog koj tham seb...."

"Txiv, tham dabtsi na, tsuag tsuag kuv tsis khoom thiab na"

"cas koj es pheej tsis khoom tas li xwb na.  Es ib ntus no tsis nug koj lawm es, koj xav li cas rau koj dablaug tus me Ntxawm na?  Ntxawm twb nyiam koj heev li, koj puas tau mus nrog Ntxawm tham thiab na?"

"Txiv a, kuv twb tsis muaj sij hawm li na, es yuav ua cas mus ntsib tau Ntxawm na...thiab tsis tas li los, ntshe Ntxawm twb muaj hluas nraug lawm thiab os. thiab kuv tsis xav mus saib Ntxawm, vim kuv twb muaj hlaus nkauj lawm na."

"Yog koj muaj hluas nkauj, cas koj tseem pheej mus laij tsaus ntuj ntais es yog koj mus nrog hluas nkauj nyob xwb los? los yog koj pheej mus dabtsi tsaus ntuj ntais li ma?"

"txiv, mus qhov twg los kuv mus qhov zoo xwb mas, cas nej tej laus ko mas, tsis paub li los pheej lam tau lam hais li lau."

"txawm yog tsis paub es, thiaj li pheej hais ua luaj li mas, yog paub ces twb tsis hais npaum li no li los mas. cas hais zaum twg mas, koj tab hais li ko rau kuv tas li xwb na.  Tagkis koj mus saib Ntxawm seb koj puas nyiam Ntxawm, es nws twb kawm ntawv tag lawm thiab, yog koj nyiam no, peb mus hais Ntxawm rau koj os, ntev lawm thiab, koj ua nraug laus lawm zuj zus lawm na, tsam koj niam wb tsis txawj tau me ab los nrog luag puag os."

"aws, hais ntau ua luaj li, tagkis kuv mam hu mus seb Ntxawm puas nyob lawm es kuv mam li mus saib nws ib pliag mas.  Kuv mus lawm os yog tham li no xwb na"

"oooo, tej niag tub no mas, cas hais mas tsis mloog li, tab maj maj khiav mus lawm xwb lau..."



TO BE CONTINUE....

Thov tos nyeem mus seb Tsab thiab Ntxawm ho yuav mus tau zoo li cas
NCO kuv tsis PLOJ
NCO ntsoov kuv MOG
NCO kuv tag tiam NO


KhawsCia6Kuv Tag1SIM

#7
PAUB1zaugNCO1sim

PAUB1zaugNCO1sim

    Bachelor Degree 1

  • Members
  • 153 posts
Reputation: 1
Neutral
Txog rau hnub Saturday, Tsab tsis muaj dabtsi ua, tsuas ncig nquj nquas rau tom ub tom no xwb tsis paub xyov yuav ua dabtsi thiaj tag ib hnub.  Cas lub hnub yuav ntev ua luaj li.  Nws thiaj xav zoj tias, "ab, sim hu mus rau Ntxawm seb nws puas yuav khoom nrog kuv mus ncig uasi ib pliag seb."  Nws thiaj nthov nkaus lub xov tooj coj los hu Ntxawm.....Ring, ring, ring..........

"Hello...leej twg os?"

"Ntxawm puas nyob lawm ne? kuv nrog Ntxawm tham os." Tsab hais rau hauv lub xov tooj. Lub suab uas teb ntawd thiaj hais tias,

"Ntxawm nyob kawg mas, koj tos nawb."

"Aws."

Tus teb xov tooj thiaj nqa lub xov tooj mus cev rau Ntxawm.

"Leej twg na Kiab?"

"Tsis paub es, hais tias yuav nrog koj tham no xwb." Kiab uas yog Ntxawm tus niam hluas teb rov qab rau Ntxawm ceev nrooj ces tig loo mus rau tom nws txaj lawm.

"Hello, leej twg os?" Ntxawm teb rov rau hauv lub xov tooj.

"yog Tsab os Ntxawm.  Koj puas khoom hnub no ne? yog koj khoom no kuv tuaj tos koj wb mus ncig uasi ib me chim puas yuav tau nab lov?"

"oh, tau kawg mas, kuv tsis muaj dabtsi ua thiab os...es koj yuav coj kuv mus qhov twg ma Tsab?  Ua cas es tej hnub no tshav ntuj li nrig koj ho lam hu kuv yuav coj kuv mus uasi nev yom, yog hmoov dabtsi tiag ne lov...hehehe..."

"yog koj hmoov mas Ntxawm.  Kav tsij hnav khaub ncaws es kuv tuaj coj koj nrog kuv mus uasi nawb.  Ib me pliag no xwb kuv tuaj txog ntawm koj tsev lawm ov. Txhob cia kuv tos tos nawb, ok."

"aws, ua li os Tsab, tuaj mas, kuv mam li npaj kom ready by then os."

Tsab muab phone khwb rau tag ces nws kuj luag ntxhi hauv nws lub siab, tiamsis nws tsis paub xyov nws ho yuav nrog Ntxawm tham yam twg los yog tham li cas thiaj zoo lub siab.  Nws hnav tsuag tsaug tau ib lub ris ntaub dub thiab ib lub tsho dawb.  Nws txawm tawm nraum zoov npaj siab yuav mus coj Ntxawm mus ncig uasi.  Mus txog rau tom Ntxawm tsev, Ntxawm twb tu cev tag lawm.  Nws hnav ib daim tiab dawb nrog ib lub tsho dub.  Tsab luag nyav thiab hais tias,

"Wow, koj hnav tau haib ua luaj.  Cas koj ho paub tias kuv yuav hnav dawb thiab dub es koj ho hnav dawb thiab dub thiab ma los?"

"Kuv tsis paub as Tsab, kuv tsuas npaj hnav li no nrog koj mus uasi xwb, tabsis mas cas koj ho hnav dawb thiab dub ib yam li kuv thiab na los?"

"hehe, tej zaum yog wb hnub hnub no os yom Ntxawm, thiaj li hnav tau ib yam mas lov....nkag los hauv tsheb no las, es wb yuav mus uasi os."

ces Tsab thiab Ntxawm nkawv thiaj mus uasi rau tom ib tug me nyuam dej taug kev ncig yuj yeev....

TO BE CONTINUE...

mam rov los sau dua ib me pliag....ua tsaug uas nej los nyeem os
NCO kuv tsis PLOJ
NCO ntsoov kuv MOG
NCO kuv tag tiam NO


KhawsCia6Kuv Tag1SIM

#8
PAUB1zaugNCO1sim

PAUB1zaugNCO1sim

    Bachelor Degree 1

  • Members
  • 153 posts
Reputation: 1
Neutral

View Postnraugzaj, on Aug 22 2008, 12:52 PM, said:

koj tsis kom lawm los cas tsis tuaj sau lawm. kuv laj laj tos lawm na.


hehehe....yog muaj tus los nug txog thiab tos tos li koj ces, kuv kuj muaj siab tuaj sau xwb mas.....xav tias ntshe tsis txawj sau es tsis muaj neeg tos nyeem, es thiaj li pheej laug thiaj tsis tau tuaj sau xwb os......

ua tsaug pab los nyeem thiab txhawb kuv lub zog sau nawb.....
NCO kuv tsis PLOJ
NCO ntsoov kuv MOG
NCO kuv tag tiam NO


KhawsCia6Kuv Tag1SIM

#9
PAUB1zaugNCO1sim

PAUB1zaugNCO1sim

    Bachelor Degree 1

  • Members
  • 153 posts
Reputation: 1
Neutral
Hnub no uas Tsab thiab Ntxawm nkawv mus uasi mas nws tshav ntuj nrig xwb, tsis muaj ib tauv huab nyob saum ntuj li.  Cov cua tuaj tau laj ntxiag txias zias, hos tseem hnov suab kab noog quaj zom pes zaws...Nkawv taug taug kev ib pliag ces Ntxawm txawm tsa ncauj los nug tias,

"Tsab, es hnub no yog dabtsi hnub es koj ho yuav tuaj coj kuv mus uasi ne yom ov...?"

"hehehe...hnub no tsis yog dabtsi hnub os Ntxawm, hnub no yog koj hnub thiab kuv hnub....es koj tsis xav nrog kuv ncig uasi lov...?"

"Kuj tsis muaj dabtsi thiab os Tsab, tabsis kuv tsuas lam xav ntau ntau xwb...vim tias kuv twb paub tias koj yeej muaj hluas nkauj lawm.  Hnov kuv niam tham tham li es, puas yog koj tuaj coj kuv mus ncig uasi no twb yog vim koj txiv thiab kuv txiv lawv xav kom wb...kom wb..."

"xav kom wb....dabtsi na Ntxawm?  Cas koj hais tsis tawm li nas lov...?"

"puas yog lawv xav kom wb...sib tham los sib sau uake, es hnub no koj thiaj tuaj coj kuv mus uasi nas lov....?"

"Ntxawm...tej laus luag yuav xav li cas los, txij li lawv txoj kev xav xwb, hos yuav ntaus tau txoj kev sib hlub los yog sib raug zoo, qhov no yog nyob ntawm koj thiab kuv wb xwb...yog wb ob lub siab xav tau tias, kuj sib nyiam tiag es ho sib raug zoo tau ces yeej tsis tas tej laus yuav muab wb yuam los mus uake li os....hnub no kuv xav tias tsis muaj dabtsi ua thiab es ntev heev lawm, tsis tau pom koj txij li puag thaum uas peb tseem yau lawm xwb, es kuv thiaj xav tias hnub no kuv tuaj coj koj nrog kuv mus ncig uasi no xwb, es txhob xav li cas nawb Ntxawm..."

"wss, kuv tsis xav li cas li os Tsab, kuv zoo siab heev tias koj tseem xav txog kuv thiab es ho tuaj yaum kuv nrog koj mus...vim koj hluas nkauj los twb muaj coob, koj tseem yaum kuv nrog koj mus thiab, es kuv haj yam zoo siab heev li no xwb..."

Nkawv ob leeg taug taug kev los txog rau ntawm ib lub rooj nyob ntawm ntug kev ntawm tus dej ntawd, ces nkawv thiaj li los zaum uake rau ntawm lub rooj ntawd.  Nkawv zaum zaum ntev loo, ib tug tsis paub yuav pib li cas tuaj nrog ib tug txuas lus.  Nkawv zaum zaum ntsiag to ntev loo li ntawm 10 nas this, ces Tsab thiaj mam tsa ncauj los hais tias,

"Ntxawm, cas ntsiag to lawm xwb es tsis hais lus li lawm na los...?"

"oh, tsis muaj dabtsi os, kuv tseem pheej xav txog tias cas kuv muaj hmoo ua luaj es hnub no tau nrog koj tuaj ncig uasi li no xwb..."

Ntxawm hais luag nyav ces nws ho fee mus rau ib sab lawm.

"Ntxawm, tig los nov ma, cas ho tig mus lawm thiab na?  Tig los nov es kuv thiaj pom koj lub me ntsej muag luag ntxhi ma lov..."

"Tsab...tseem txaj txaj muag xwb...vim ib txwm thaum me peb sawv daws ua ua ke zoo li nkauj muam nraug nus xwb, es nim no koj coj kuv tuaj uasi li no es ua rau kuv pheej xav tias cas thauv peb nim dhia ua si uake zoo li ib ntsais muag xwb, es nim no nyias txawm siv loj loj nyias.  Xav tsis txog tias yuav muaj hnub no li no xwb os...."

"Ntxawm, li cas los, twb muaj hnub no lawm mas lov.  Thaum me mas haj xam tias peb tseem me nyuam yaus tsis tau paub tab, dhia rau ub rau no yam lom zem xauv npo, sib txeeb khoom sib ntaus sib ceg, tabsis hnub no, txawv thaum yau lawm....hehehe....es hnub no, twb tsis sib txeeb khoom los yog sib ntaus sib ceg lawm nev, hnub no twb yog ib hnub uas zoo zoo es thiaj tau tuaj zaum ua ke li no es txhob xav ntau ntau ma Ntxawm...kuv coj koj wb mus ncig lawm nram dej nrav yom, koj puas xav li cas nab?"

"tau kawg mas Tsab...mus los mus los mav..."

Nkawv ob leeg thiaj sawv ntawm lub rooj ntawd, ho rov taug taw dua mus lawm nram dej.  Tsab nkawv taug taug kev ib pliag Tsab cev tes los tuav Ntxawm txhais tes.  Ntxawm tshem zog nws txhais tes, tig los ntsia Tsab...Tsab ho luag nyav rov rau nws, ces nws thiaj luag nyav thiab rov cev tes rau Tsab tuav nws txhais tes...Nkawv taug taug kev ib pliag ces Ntxawm thiaj hais rau Tsab tias,

"Tsab, koj puas nco qab puag thaum ub peb tseem yau, es koj pheej nrog nrog nej ib co menyuam tub tua tua "maum npis..?" (marbles) es kuv pheej tuaj saib koj tua maum npis tas li, es koj hais rau kuv tias seb kuv puas xav kawm tua maum npis, yog kuv xav no koj mam li qhia kuv...?"

"oh, kuv nco tau mav, thaum ntawd, koj mas tuaj saib kuv tua maum npis tas li xwb, tabsis kuv hais tias kuv mam qhia koj tua no los koj co co tob hau xwb koj twb tsis teb kuv ib los li thiab na....hais npaum cas los, koj tsuas teb ib lo tias, "kuv ntsia koj xwb os" no xwb mas ua rau kuv cia li tsis paub yuav hais li cas rau koj li lawm thiab tiag...hehehe..."

"hehehe...Tsab yom, thaum ntawd mas, menyuam yaus tiag li os...tseem so ntswg tav toj, tseem hnav cov ris uas yuav ntev tsis ntev, yuav luv tsis luv, hos koj hnav koj lub tsho mas khawm puag saum caj dab los txog ntawm plab, tseem muab khi ua lub pob caus rau ntawm plab, hos nrog lawv tua maum npis tus me lo av li...hehehe...hos kuv mas, tseem hnav cov tiab kaus poos zoo li uas thaum tseem nyob tim thaibteb...tabsis mas lub sij hawm ntawd koj puas paub nab...tias cas kuv pheej tuaj saib koj tua maum npis tas li xwb....?"

"wsss..kuv tsis paub as, es yog vim li cas ma? koj laj laj nyob hauv tsev lov? los yog kuv keej keej tua maum npis na? los yog vim kuv lo lo av li thiab khub khub ntswg es tas tas lauv es koj thiaj li xav tuaj saib tas li ma lov...hehehe..."

"tsis yog li ko, thaum ntawd tseem yog menyuam yaus xwb, tiamsis mas kuv twb nyiam nyiam koj thaum ntawd los lawm hov...koj puas ntseeg ma, es thiaj li tuaj zov koj tua maum npis tas li xwb ntag laub...."

"Puas yog ma Ntxawm...cas koj tsis hais ib los qhia rau kuv paub los yog qhia rau leej twg paub tias koj nyiam kuv li ma lov...yog koj qhia mas, kuv twb lees kiag koj puag thaum ub los lawm nav....koj mas, siab phem tshaj li lau yom....hmoob tus me ntxhais no os...puas yog na....hehe?

"mas kuv kuj xav qhia koj heev li os Tsab, yeej xav qhia koj paub tabsis mas ho ntshai tias koj thiab kuv sib txheeb dhau lawm es tsam koj tsis nyiam kuv xwb es ho txaj txaj muag. yog li no kuv thiaj li zais los txog tav no tsis qhia koj xwb los mav...es koj puas chim rau kuv na?

"wss, kuv tsis chim li os Ntxawm, es chim ua dabtsi ma lov?  tsuav yog ho muaj koj pab nyiam kuv los mav, kuv twb ntshai tsam koj tsis nyiam thiab ces ntshe yuav tsis muaj leej twg nyiam hlo li no...ab Ntxawm, hnub no es nim tshav ntuj nrig, es hauv koj lub siab koj puas muaj ib qho uas nco nco leej twg li nab? Koj puas yuav kam qhia kuv nas yuam?

"Tsab, kuv tsis muaj os...yog yuav nco, hummm, ntshe nco koj xwb laub, puas kam ma...hehehe...?"

"Puas yog ma Ntxawm?  Nco kuv ntag?  Es koj txawm siv nco kuv lawm ntag?  Wow, cas koj yuav hais tau rau kuv zoo siab ua luaj li ma lov..."

"Hais tiag mas Tsab...ntshe nyuam qhuav tuaj uasi thawj zaug li no xwb koj tsis ntseeg kuv, tabsis mas kuv yeej nco koj tiag li hov..."

Ntxawm hais li tag nrho, nws khoov loo mus kov kov dej ces nws tig tuaj rau Tsab...Tsab ntsia nws kov kov dej, Tsab luag nyav tuaj rau nws, ces nws txawm tib ntov dej tuaj rau Tsab ua rau Tsab lub ntsej muag ntub dej tag...Tsab luag luag ces Tsab txawm khoov loo mus rau hauv ces txawm ib ntov dej rov tuaj rau Ntxawm dub loo dej lawm thiab.  Nkawv ob leeg txawm khiav yeev sib caum ntawm tus dej ntawd, ke caum ke ntov dej, luag nyuj nyav rau tom ub tom no zoo li ob tug menyuam yaus sib caum ntov dej uasi...thooj txhij thaum ntawd, Tsab txawm ib zaim muag thiab xav zoj txog thaum Sua thiab Tsab nkawv mus uasi rau tim Yosemite National Park uas yog thawj zaug ntawm txoj kev hlub Tsab muab nthuav rau Sua.  Ua rau Tsab nres loo xav zoj txog Sua...

"Abbb Sua, koj nyob li cas lawm...koj puas tau mus muaj dua tus tshiab? los yog koj tseem tos kuv ib leeg xwb?  Cas hnub no kuv lam tuaj nrog Ntxawm uasi ntawm no los cas kuv lub siab es xav ntsuj ntsoov txog koj xwb...cas hnub no Ntxawm wb yuav tuaj kov dej ntawm no, es yuav ua rau kuv ras dheev nco txog koj thaum uas tseem muaj koj nrog kuv nyob uake luag li ntxhi os Sua...es koj puas nco txog kuv lawm thiab nas lov....?"

"Tsab a, Tsab, Tsab a..." Ntxawm hu hu Tsab ib pliag zoj Tsab mam li rov xeev tsim ntawm nws txoj kev xav los tig ntsia Ntxawm.

"Tsab, koj tseem pheej xav txog leej twg lawm na?  cas yuav nres ntawm ko ntev ua luaj li nas lov?"

"hehe...kuv tsis xav txog leej twg li os...kuv tseem xav tias wb twb tuaj ntev lawm thiab ces, kuv xa koj mus tsev no nas lov...koj puas xav li cas os?"

"tau kawg mas Tsab, tuaj ntev lawm thiab ces, koj xa kuv mus tsev tso, lwm zaus muaj caij wb li rov tuaj uasi dua los tau mav..."

Tsab tsis qhia yam uas nyob hauv nws lub siab rau Ntxawm tias, qhov nws tsis qab siab no lawm los twb yog vim nws tab tom xav txog Sua, tias Sua ho noj nyob li cas thiab puas tseem nco xav txog nws lawm....thiaj ua rau nws tsis nco qab xav txog Ntxawm tias tseem muaj Ntxawm nrog nws nyob uake lub sij hawm ntawd...Tsab thiab Ntxawm nkawv thiaj los txog rau tom tsheb uas Tsab tab tom npaj yuav coj Ntxawm los mus tsev. Ntxawm thaij nug Tsab tias,

"Tsab, es wb tuaj uasi li no, koj xav li cas xwb?  Thiab qhov uas kuv qhia koj tias kuv twb nyiam koj los lawm ntev, koj ho xav li cas thiab nab?  Koj puas xav tias, tej zaum wb txoj hmoo kuj yuav los sib ncav thiab? "

Tsab ntsiag to, tsis tau teb Ntxawm lo lus nug nws, ua rau Ntxawm tsis pom qab yuav hais zaj twg ntxiv, nws cia li ntsiag to lawm thiab, tsis paub yuav txuas lus li cas tuaj...Ib pliag zoj, Tsab thiaj mam teb Ntxawm tias,

"Ntxawm, kuv paub tias thaum yau mas peb sawv daws yeej yog tseem yau yau, tiamsis nim no loj tuaj lawm, qee yam tsis mus raws li yav thaum yau uas yus lub siab tau xaiv tseg lawm...tsis paub yuav piav li cas rau koj es thiaj piav tag qhov kev xav uas nyob rau hauv kuv lub siab no li os Ntxawm..."

"Tsab, yog koj hais li ko, kuv nkag siab lawm...tsis tas yuav piav kom tag li os...yog hauv koj lub siab, xav tias txais tau kuv npaum li tus muam xwb los, kuj yog ib qho zoo es mam ua nkauj muam nraug nus sib hlub sib pab xwb los, kuv kuj tsis pom qab yuav tusiab...hais li koj hais ko, kuv to taub zoo tias, hauv koj lub siab muaj tug nyob lawm, koj tsis muaj chaw rau tus neeg zoo li kuv, puas yog?"

"Tsis yog li ko os Ntxawm, tsis yog kuv lub siab tsis muaj chaw rau koj nyob, tiamsis vim wb sib txheeb dhau lawm.  Yeej yog li koj hais, wb yeej sib txheeb dhau lawm. Hais lo lus siab siab koj, txhua lub caij uas thaum yau los txog rau niaj hnub no, kuv zoo siab heev uas puag tab tau hnov koj cov lus tias koj nyiam kuv heev, tiamsis hauv kuv lub siab, xyov li tiag, xyov yuav hais li cas thiaj li zoo...kuv...kuv....kuv tsuas hlub koj li kuv ib tug muam xwb...tsis tau tshaj qhov ntawd..."

Ntxawm ua kua muag teev yees, tsis paub yuav hais li cas ntxiv...kua muag ntws nto poob nthav tsis tsa hau los ntsia Tsab.  Tsab rub loo Ntxawm los puag rau hauv nws lub xub ntiag ruaj ruaj...Ntxawm los khawm loo Tsab rau Ntxawm lub xub ntiag thiab...tsis paub yuav hais li cas, Ntxawm thiaj li hais tias,

"Tsab a, ua tsaug nawb, uas koj qhia qhov tseeb rau kuv.  Kuv yeej tsis chim thiab tusiab rau koj li os...yav tag los uas kuv nyiam thiab hlub koj rau nruab siab, nim no kuv paub lawm...mam li xav tias, tsuas yog ua tau nkauj muam nraug nus xwb, es dhau hnub no mus, kuv yuav tsis ntsia koj tam li ib tug neeg kuv hlub tuaj nruab siab li lawm...kuv yuav saib koj li kuv ib tug nus lawm xwb...Ua tsaug mog..."

Ntxawm hais li tag, nws tso plhuav Tsab ces nws txawm mus tom nws sab tsheb, nkag rau hauv ces zaum quaj puas muag nti lawm xwb...Ua rau Tsab xav tsis tag, ib ke xav, ua rau nws ntxub nws tus kheej kawg tias cas nws ho yuav hais tau li no rau Ntxawm...Tabsis nws ho rov xav dua tias, tsis hais hnub no los yuav tau hais ib tug tom ntej no...ces ntxov hais tag thiaj tsis ua mob siab rau yav pem suab...vim nws hlub Sua ib leeg xwb...nws paub li ntawd hauv nws lub siab lawm, tias yuav hlub Sua ib leeg xwb.  Nws nkag loo rau hauv tsheb, nws tig mus ntsia Ntxawm ib pliag, ces nws thiaj tsav loo tsheb thauj Ntxawm los mus tsev lawm....

Thaum thauj Ntxawm los tsev, nws ke tsav tsheb ke xav txog Sua tas li xwb...nws xav rau hauv siab tias, los txog tsev nws yuav hu mus nrog Sua tham seb Sua nyob li cas lawm...tabsis nws ho ntshai tias tsam Sua tsis kam teb nws thiab tsis kam nrog nws tham.  Nws ho xav tias ncaj qha mus saib Sua nram tsev, nws ho ntshai tias tsam mus Sua tsis nyob tsev lawm thiab los sis tsam ho pom hmoob tuaj nrog Sua nyob ces haj yam mob siab...nws thiaj xav tias, cia mus txog tsev, mam li hu mus nrog Sua tham xwb...


TO BE CONTINUE...

Tsab tso Ntxawm tseg, cia seb Tsab thiab Sua nkawv ho yuav mus zoo li cas tom ntej no...Ua tsaug los nyeem os..
NCO kuv tsis PLOJ
NCO ntsoov kuv MOG
NCO kuv tag tiam NO


KhawsCia6Kuv Tag1SIM

#10
PAUB1zaugNCO1sim

PAUB1zaugNCO1sim

    Bachelor Degree 1

  • Members
  • 153 posts
Reputation: 1
Neutral
Rinnnng...rinnnng...rinnnng...rinnnnng....

"yog ua cas tsis muaj neeg teb xov tooj li ne...." Tsab xav rau hauv nws lub siab thaum uas nws thauj Ntxawm mus txog tsev es nws los txog tsev, nws los hu rau Sua.  Nws rov muab lub xov tooj khwb rau, ces rov qab sim hu dua...zaum ob no los tsis muaj neeg txais xov tooj li thiab.  Nws rov sim dua zaum peb, cas tsis muaj neeg txais xov tooj li thiab...

"Ab, lawv mus qhov twg tag lawm ne, cas hu tsis muaj neeg txais xov tooj li ne...kav liam lau twb lig lawm thiab ces tagkis mam rov sim hu dua seb."

Tsab muab lub xov tooj rov khwb twj ywm cia...ces nws los zaum rau ntawm xaus loos los saib TV.  Nws Txiv zaum ntawm ib sab, hos nws niam zaum ze rau ntawm qhov rais ua paj ntaub.  Nws txiv txawm tsa ncauj los nug nws niam tias,

"Koj niam, cas es ib hnub no kuv tsis pom Ntxiag li es, Ntxiag mus dua twg lawm na...?"

"tagkis no nws kuj nyob hauv tsev thiab mas, tabsis xyov cas tsis pom lawm, ntshe nws nrog nws cov phoojywg mus uasi lawm ho..."

"ob yo, tej niag me nyuam no mas, tsuas pom mus li mus xwb, tsis paub tias muaj vaj muaj tsev es yuav los nyob hauv tsev me ntsis kom yus ho pom thiab lau, cas yuav mus laij taus tag npaum li os...es Tsab, koj ne, tagkis no koj mus ploj lawm ib hnub thiab es koj ho mus ua tus dabtsi lawm thiab na?"

"Txiv, es koj twb xav kom kuv mus saib dablaug lawv tus Ntxawm no ne, es tagkis no kuv thiaj li mus coj Ntxawm nrog kuv mus uasi lawm xwb los mas..."

"oh, ua li los, es koj coj Ntxawm mus uasi es, puas hais tau haum siab thiab na? koj ho xav li cas rau Ntxawm thiab xwb?"

"Txiv, qhov ko txhob hais txog os, kuv tsuas hlub tau Ntxawm li yog kuv ib tug muam xwb es, yuav ua cas yuav tau los ua kuv tus pojniam na...yus niaj hnub pom nws, thaum yau los uasi uake zoo li nkauj muam nraug nus xwb es, kuv yuav ua cas yuav los nrog kuv nyob na.  ntshe yuav zoo li nus muag los pw uake xwb, kuv tsis nyiam li ntawd na txiv..."

"Tsab, txawm tias zoo li nus muag xwb los, twb tsis koom xeem na.  yog nej tej menyuam sib sau tau los uake, haj yam yuav txuas nruab txuas ze xwb na, thiab haj yam yuav muaj kev sib hlub mus rau tom ntej xwb na...es koj tseem pheej hais tias zoo li nus muag xwb es txaj txaj muag no..."

"Txiv, kuv paub mas, tias yeej tsis yog koom xeem, tiamsis Ntxawm thiab kuv no na, sib txheeb dhau heev lawm.  Twb sib txheeb npaum li no, ces sib hlub li no xwb tau lawm...txuas nruab txuas ze ntxiv, tsam tsuas zoo Ntxawm wb txawj ua neej es sib sib hlub, nej tej laus ho tau chaw vam, yog wb tsis txawj sib hlub, ces haj yam yuav ua rau dablaug thiab peb sawv daws muaj chaw dub muag thiab haj yam tsis xav sib hlub rau yav tom ntej no na txiv.  Tsis li los, kuv tsis paub xyov hauv kuv lub siab no, puas yuav hlub tau Ntxawm na, vim tias kuv ib txwm saib Ntxawm zoo li kuv tus muam xwb, es yuav cia li nyob nyob mus hlub kuv tus muam, zoo li tsis khws hlo li os...txiv...kuv qhia rau niam neb paub tias, kuv txiav txim siab lawm...kuv tsis yuav Ntxawm no..."

Tsab hais li tas nrho, nws sawv tsees mus rau tom nws hoob txaj lawm...Nws txiv ntsia nws mus ploj ntais, nws txiv thiaj mam hais lawv nws qab tias,

"oooo, tej niag tub mas, cas nws yuav yuav nws siab nkaus xwb tsis paub tias tej laus yuav xav li cas thiab no los cas li lau..."

Tsab los txog hauv nws hoob txaj, nws thiaj li los thau tau Sua daim duab coj los saib, cas pom Sua luag nyav tuaj rau nws...lub sij hawm tamsim ntawd, ua rau nws nco Sua tshaj plaws li tsis muaj ib yam dabtsi los pauv tau li...thiab ua cas thaum nws ntsia Sua daim duab ntawd, yuav ua rau nws zoo siab tias tseem pom Sua daim duab luag nyav rau nws, tabsis mas ua cas ntsia Sua daim duab ntawd, kuj ho ua rau nws zoo li lub siab meem meem txom...es yog meem txom dabtsi tiag?  Nws tsis paub...nws tsuas paub tias qhov meem txom no, tsis yog hauv nws tus kheej los yog hauv nws tsev neeg...tabsis zoo li dabtsi pheej ua rau nws txhawj txhawj, tiamsis tsis paub tias yog txhawj txog dabtsi li thiab...nws muab Sua daim daub hnia ib pas, ces nws thiaj rov muab rhais rau ntawm nws lub thev, ces nws txawm mus nce qhau cev pw saum txaj...kuj tsis tau tsaus ntuj kiag thiab, tiamsis nws nyob nyob, nws cia li tsaug zog lawm....

Zoo li Tsab nyuam qhuav tsaug zog zoj ib me pliag xwb, ua cas nws txawm siv pom Sua los luag li nyav rau ntawm nws...Nws cev tes mus khawm Sua, hnov Sua lub suab luag nyav mus dhau plaws nws, nws tig loo mus xam zoj qhov txhia chaw cas rov pom nws nyob ib leeg...xam yuj yees rau tom ub tom no tsis pom Sua nyob qhov twg.  Nws zaum khwj ywb ib me pliag, rov pom zoo li Sua los los rau ntawm nws, ua cas zaum no Sua ho hnav tau ib ce zam tshiab khiv, zoo li yuav mus nquam paj nquam nruas yuav mus kav kiab kav khw...nws hais rau Sua tias,

"Sua, es yog ua li cas koj ho hnav cev khaub ncaws ko na, es twb tsis tau txog peb caug ne...."

"Tsab, twb yog kuv nco nco koj, es kuv los saib koj ib pliag xwb kuv yuav mus..."

"koj yuav mus lawm qhov twg na Sua...qhia kuv ma..."

Tsab hais tag nrho, nws ncav los mus muab Sua rub los khawm rau hauv nws lub xub ntiag, tabsis mas nws ib ntsais muag xwb, Sua twb rov ploj ntshis ntawm nws lub qhov muag mus lawm.....

"Sua, Sua a, Sua...koj dua qhov twg lawm na Sua....Sua a......Sua....

"Tsab...........kuv hlub koj os...." hnov Sua lub suab hais lo lus ntawd lim loog, xyov yog hais tog twg tuaj li...

Tsab rov hu hu Sua lub npe...hu hu tsim dheev nruab dab ntub los...cas txawm siv yog kaj ntug rau ib hnub pib tshiab lawm...Nws sawv los zaum rau ntawm txaj xav txog nws zaj npau suav txog Sua...cas yuav txawv ua luaj...nws tsis paub xyov yog ua li cas, tabsis nws paub hauv nws lub siab tias, ua cas nws yuav nco Sua ua luaj li lawm xwb...yog hais tias hu hnub no tseem tsis ntsib Sua thiab ces tej zaum nws yuav mus loo rau nram Sua lawv tsev es mus saib Sua nram tsev mas siab thiaj yuav nqig.

                                                   * * * * * * * * * * * * * * * * * * * * *

Rinnng, rinnnnn, rinnnng..........

Twb yog tav li 11 sawv ntxov yuav txog caij tav su lawm thaum uas Tsab hu mus rau Sua.  Cas xov tooj nrov nrov tsis muaj neeg teb li...nws ho muab lub xov tooj khwb dua...ces rov muab coj los hu zaum ob...thaum lub xov tooj pib nrov dua, nws lub siab pib xav zoj tias "humm, yog dabtsi tiag ne...cas tsis muaj neeg teb xov tooj li ne...?"

Thaum uas lub xov tooj nrov txog zaum 4, Tsab tab tom yuav muab khwb no ua cas hnov lub suab teb "hello" no nkees nkees sab tov tuaj.

"Pajhuab los?"  Tsab nug ceev ceev

"Aws, yog mas, koj yog leej twg os...?" Pajhuab teb tsuag tsawv rov qab

"Pajhuab, kuv yog Tsab os...ua cas zoo li koj nkees ua luaj li na lov...? Es Sua puas nyob lawm os, kuv xav nrog Sua tham no na..."

Tsab hais li tag nrho, cas ntsiag lawm ib pliag tsis hnov teb sab tov tuaj...Tsab xav tias ntshe Pajhuab muab lub xov tooj khwb lawm, nws muab lub xov tooj rov los saib, cas cov nas this kuj tseem khiav khiav, tseem tsis tau khwb lub xov tooj, nws thiaj rov nug dua tias,

"Pajhuab a, Sua puas nyob lawm os...kuv nrog Sua tham os, puas tau nas lov...cas koj cia li ntsiag lawm na?"

"Tsab, es koj tsis paub tias kuv tus niam laus Sua twb tsis zoo neej es nws mus pw pem tsev kho mob tau ob peb hnub no lawm...es kuv niam peb pheej mus zov zov nws es tagkis no kuv nyuam qhuav los txog tsev no xwb...koj tsis paub li los?"

Tsab lub siab poob ntav, nws xav tsis tau zaj twg coj los hais los yog los nug Pajhuab, nws tsis paub yuav hais li cas...nws lub kua muag poob nthav tamsim thaum hnov Pajhuab hais tias Sua twb tsis zoo neej thiab twb mus pw tsev kho mob tau ob peb hnub lawm...cas nws ho tsis paub txog li...nws txhais tes loog tag tsis muaj zog tuav lub xov tooj ntawm tes, nws thiaj rov muab lub xov tooj los tham thiab nug Pajhuab tias,

"Pajhuab, es yog vim li cas tiag? koj puas kam qhia kuv os?"  

Pajhuab quaj quaj sab tov tuaj...tsuas hnov Pajhuab lub suab quaj ncuj nciav xwb, ua rau Tsab xav tau hauv Tsab lub siab tias, ntshe yuav muaj tej yam tsis zoo, es Pajhuab thiaj li quaj heev ua luaj...haj yam ua rau Tsab lub siab tsis kaj li...

"Pajhuab, thov ma los, thov koj qhia rau kuv seb yog ua li cas rau koj tus niam laus Sua os..."

"Tsab, tsis paub thiab, Ob lub week tag los, nws mus ua hauj lwm es, nws cia li tsaus muag ntog pem hauj lwm lawm xwb.  Pem hauj lwm lawv twb muab Sua thauj mus rau pem hoos maum lawm lawv mam li hu los qhia rau kuv niam peb paub...es peb mam li mus saib Sua pev lawm xwb...tsis paub tias yog vim li cas Sua thiaj li zoo li no...kuv tus niam laus Sua ib txwm twb tsis muaj mob hlo li, xyov cas nws cia li zoo li no lawm, nws nyuaj siab li cas los nws twb tsis qhia kuv paub li, los yog qhia rau leej twg paub li.  Tabsis nais maum hais tias, zoo li nws lub plawv tsis muaj zog ntoj vim thaum nws tsaus muag ntog ntawd, nws mob "sudden heart attack".  Nais maum tias, lawv muab nws dai dej seb nws puas tsim, tabsis mas nws tsis tsim li, lawv txhaj tshuaj rau nws tag los, zoo li nws tsis xav tsim li...thiab kuv niam peb mus zov, muab mov nws noj los nws pheej tsis kam noj, nws pheej hais tias nws tsis tshaib plab no xwb...es kuv tsis paub yuav ua li cas li lawm os...

Pajhuab ke hais ke quaj nrog, tsis paub yuav ua zaj twg li.  Tsis li xwb, nws mus nrog nws niam zov zov Sua ib hmos no nws sab heev, zoo li nws twb tsis muaj zog quaj tas nrho.  Tsab mloog Pajhuab piav piav, Tsab lub kua muag tsuas muaj ntws los xwb, thiab hauv nws lub siab tsheej tej zag zag, tsis paub yuav ua zaj twg lawm...Tsab thiaj nug Pajhuab tias,

"wss, Pajhuab a, Sua mus pw lub hoos maum twg os? koj puas kam qhia kuv os?"

"Sua mus pw tom Community Hospital os Tsab...seb koj puas tuaj saib nws thiab os, yog koj tsis tau paub na..."

"aws, kuv mam li tuaj os, ua tsaug nawb Pajhuab...kuv tuaj lawm os..."

Tsab khwb loo xov tooj, kua muag ntws si, nws tsa suab quaj thiab hais Sua lub npe tsis tso tseg...thiab thov twj ywm hauv siab tias kom Sua txhob ua li cas kom txog thaum nws tuaj txog Sua.  Tsab hnav zoj khaub ncaws zoj zeeg ces tawm plaws rau nraum zoov npaj mus saib Sua nram hoos maum...


TO BE CONTINUE...

thov tos nyeem seb Sua thiab Tsab nkawv yuav zoo li cas...ua tsaug
NCO kuv tsis PLOJ
NCO ntsoov kuv MOG
NCO kuv tag tiam NO


KhawsCia6Kuv Tag1SIM

#11
PAUB1zaugNCO1sim

PAUB1zaugNCO1sim

    Bachelor Degree 1

  • Members
  • 153 posts
Reputation: 1
Neutral

View Postnraugzaj, on Aug 23 2008, 09:35 PM, said:

zaj dab neeg no ma haib kawg, tsuag tsuag kuv laj laj tos lis lawm os nawb. twb nyeem tsuag tsuag tas lawm. hehehehehe...
such a beautiful story, i love it.


Wow, koj nyeem ceev ua luaj li ma...hehehe...ok, los sau lawm mas...
NCO kuv tsis PLOJ
NCO ntsoov kuv MOG
NCO kuv tag tiam NO


KhawsCia6Kuv Tag1SIM

#12
PAUB1zaugNCO1sim

PAUB1zaugNCO1sim

    Bachelor Degree 1

  • Members
  • 153 posts
Reputation: 1
Neutral
"Sua, thov kom koj tsis txhob ua li cas os nawb...thov tiag tiag...thov tiag tiag li os Sua...lub ntuj lub teb, thov nej pab tsa qhov muag saib kuv tus Sua kom nws tsis txhob ua li cas li nawb...kuv thov nej tiag tiag li os..."

Tsab ke tsav tsheb kev thov twj ywj ywm rau hauv nws nruab siab tias kom Sua tsis txhob ua li cas...yog lub neej no tsis muaj Sua lawm, nws yuav ua li cas ua neeg nyob, yuav ua li cas thiaj ua tau nws lub neej mus...vim nws tsuas hlub Sua ib leeg nkaus xwb. Nws ke xav, kua muag ke ntws yam tsis txawj tu, lub siab mob yuj li plaws tsis paub yuav ua zaj twg...

Nws tsav tsheb puag Sacramento tuaj mus rau nram Fresno.  Thaum nws tuaj txog li ib nrab ke, nws lub xov tooj ntawm tes nrov.  Nws xav tias yog leej twg ho hu nws, nws xav tias kav liam tsis txhob teb, tiamsis nws lub siab ho yuam kom nws teb.  Nws thiaj li cev tes los nthos nws lub xov tooj los teb nkaus, cas hnov ib lub suab quaj quaj sab tov tuaj...

"Koj puas yog me tub Tsab os?"

"aws, kuv yog Tsab os..."

"Me tub Tsab aw, kuv yog Sua niam os...koj puas paub hais tias kuv tus me Sua tau mob hnyav heev es nws twb tuaj pw tom tsev kho mob tau ntev hnub no lawm es nws nco nco koj kawg li es nws thiaj kom kuv hu tuaj seb koj puas yuav xyeej tuaj saib tau nws ib muag no os?"

"Sua niam a, kuv paub kawg mas, kuv twb nrog Pajhuab tham tag, nws twb qhia kuv tag lawm...es koj hais rau Sua tias, kom nws ua siab ntev dhawv tos kuv no os...es kuv twb tuaj lawm...tsis ntev no kuv tuaj txog lawm no os..."

"me tub Tsab, tuaj tsuag tsuag nawb, kuv tus Sua nco ncooooo koj kawg li es nws tsis kam noj mov li, thiab nws pheej tsis zoo li es kuv txhawj txhawj nws kawg li os..."

"Sua niam, koj tsis txhob txhawj txhawj heev os, tsam ho ua mob rau koj thiab...es koj mus hais rau Sua tias kuv twb paub lawm es kuv twb tuaj lawm no os, tsis ntev no xwb ces, kuv twb tuaj txog nws lawm..."

"Aws, ua li os me tub Tsab, koj tuaj no ces, maj mam saib kev tuaj nawb, es kuv mam li mus hais li rau Sua os..."

"aws, ua li os...Sua niam...."

Nkawv tham tag nrho, muab lub xov tooj khwb nkaus rau tag, ces Tsab tsav tsheb ceev nrooj tuaj mus rau nram Fresno lawm...Sua niam muab lub xov tooj khwb rau tag ces txawm los mus rau tom chav uas Sua pw.  Los txog rau hauv, Sua tig los ntsia nws niam thiab nug tias,

"wsss niam a, koj puas hu tau Tsab os....?"

"Hu tau lawm mas me ntxhais, Tsab hais tias nws twb tuaj yuav txog lawm no os..."

"Niam a..."

Thaum Sua tsam ncauj los hais lus nrog nws niam, nws lub kua muag ntws laim ntog lees los mus ntxaum ntxias rau ntawm nws sab tog hauv ncoo.

"Niam a, ntshe kuv yuav tsis zoo rov los li lawm os..."

"Me ntxhais, koj tsis txhob hais li ko, niam lub siab tsis kheev li os mog...niam tus me ntxhais yeej yuav tsum zoo rov los nrog niam nyob zoo li qub xwb os."

Sua niam quaj quaj los plhws zog Sua lub tob hau thiab tuav rawv Sua txhais tes uas twb tsis muaj zog tas nrho.  

"Me ntxhais Sua, niam yug tsis muaj pes tsawg leej, tsuas yug tau nej ob peb nyuag leeg xwb, es koj txiv los twb tuag tso peb ua ntsoj ua ntsuag, es hnub no kuv tus me ntxhais tseem yuav hais rau niam tias, ntshe yuav tsis zoo rov los nrog niam nyob thiab no los me ntxhais...?"

"Niam a, tsis yog li ko os, kuv...kuv tsis tau xav li ko os kuv niam...tabsis kuv paub lawm hais tias, zoo li kuv lub zog es tsuas muaj ntaug zus mus lawm xwb, es ntshe kuv yuav tsis muaj zog zoo taus rov los lawm no xwb os kuv niam..."

"tsum kiag me ntxhais...kuv tus me ntxhais yeej yuav tsis ua li cas...twb muaj niam nyob ntawm no, niam yeej yuav txhawb kuv tus me ntxhais lub zog kom zoo tau rov los nrog niam nyob xwb os mog...txhob hais li ko, niam lub siab mob mob tsis txawj tag li os..."

Sua niam quaj quaj, sawv tsees los muab Sua plhws zog thiab rub zog los qawm nkaus rau hauv nws lub xub ntiag...Sua niam tseem plhws plhws Sua lub ntsej muag twb tsis tau txaus, zoo li nws tus ntxhais tsuas muaj nphob zuj zus mus xwb, cas ua ib leej niam, thaum ntsia yus tus me nyuam nphob lawm zuj zus es yus ua tsis tau zaj twg los pab los daws nws txoj kev mob, cas yuav lam ua niam ib zaug xwb, mob lub siab ua luaj, ntsia ntsoov yus tus menyuam plam zuj zus ntawm yus lub xub ntiag, xav tias yog muab pauv tau, es muab sib pauv, cia yus tus ua niam tiv txhua txoj kev mob, es tsuav yus tus me nyuam nyob kaj siab lug xwb los cas, nim yog txoj kev xav xwb.  Nim pauv tsis tau es nws yuav ntsia ntsoov Sua nphob zuj zus ntawm nws lub qhov muag, los nws tsuas plhws tau xwb, hloov tsis tau tus mob rau nws ntoog es cia Sua zoo hlo mus...xav xav cas tusiab ua luaj.

Ib pliag zoj, lub teeb liab liab uas nyob ze ntawm Sua txaj uas ntsuas Sua lub plawv ntoj txawm cig thiab quaj nrov nrov..."pib...pib...pib...pib...." Cov thaj maum maj nrawm nroos los rau hauv Sua hoob...lawv los hais kom Sua niam tawm rau sab nrauv...Sua niam tsis paub lus mekas zoo, nws thiaj tawm rau sab nrauv...tawm los mus rau tom hoob hu xov tooj...nws thiaj li hu los rau Pajhuab tom tsev....

Rinnnnng, rinnnng, rinnnnnggg.....

"Hello...."  Pajhuab teb...

Sua niam twb tsis tau hais lus, nws lub suab twb hnov quaj sab tov tuaj lawm....

"Hello.......niam puas yog koj na, yog ua li cas lawm os niam a.....qhia kuv ma...yog ua li cas lawm os....?"

"Pajhuab aw, hu koj txiv ntxawm lawv thiab hu hlob lawv sawv daws tuaj pab nrog kuv saib Sua os...thiab koj hu tag, koj tuaj pem no thiab os, xyov yog ua li cas es lub teeb liab liab pem Sua hauv ncoo cig thiab quaj nrov nrov es nais maum los hauv Sua hoob es nais maum kom kuv tawm es lawv muab Sua hoob kaw lawm lawv tsis pub kuv nkag mus saib Sua lawm...Tsuag tsuag os me ntxhais Pajhuab...hu txiv ntxawm lawv thiab hu hlob lawv tag es koj tuaj pem no thiab os nawb...."

Sua niam nrog Pajhuab tham li tag nrho, nws niam khwb lub xov tooj lawm ces rov mus nyob nram Sua chav tos seb thaj maum lawv yuav tawm los hais li cas ntxiv...

Pajhuab thiaj li hu mus rau lawv tus txiv hlob thiab txiv ntxawm tias Sua tsis nco qab lawm, es kom lawv tuaj rau pem hoos maum tuaj mus saib Sua.  Tag ces Pajhuab thiaj li mus rau pem hoos maum lawm...thaum nws mus txog pev, nws niam nyob sab nraum Sua hoob ncig mus ncig los lub siab nyob tsis tswm.  Thaum nws niam pom nws, nws niam tsa suab loo quaj nrov nrov yam tsis nco qab txaj muag....

"me ntxhais Pajhuab, koj twb tuaj lawm los.....xyov yog ua li cas rau me Sua lawm os...."

"niam, koj txhob quaj quaj os, tej zaum tsis ua li cas thiab os..."

Pajhuab hais li tas nrho, nws khawm loo nws niam ruaj ruaj, nkawv ob leeg sib qawg quaj, tsis paub tias Sua yuav zoo li cas tom ntej no...ntshai los kuj ntshai, tusiab los kuj tusiab....quaj los quaj tsis paub yuav ua zaj twg li lawm...tsuas tos txoj hmoo seb yuav zoo li cas lawm xwb.  Ib pliag zoj xwb txiv hlob, niam hlob, txiv ntxawm, niam ntxawm thiab ob peb tug txheeb ze twb tuaj txog.  Tus txiv hlob tsa ncauj los nug Sua niam tias,

"Niam ntxawm, Sua puas tau zoo li cas na?  Cas yuav zoo li no os...ua rau peb txhua leej txhua tus txhawj txhawj txog nws heev li, es nais maum puas tau tawm los puas tau pub neeg mus saib na?"

"hlob aw, tsis paub yuav ua zaj twg li lawm os....kawg tswv yim lawm...nais maum tseem tsis tau tawm los os...Cas kuv yuav nyuaj siab ua luaj li os...yog kuv tus me Sua tsis zoo rov los es kuv yuav ua li cas os?"

Sua niam rov tsa suab quaj nrov nrov...Pajhuab plhws zog nws niam rau hauv nws lub xub ntiag los nws niam lub suab quaj tsis ntsiag li.  Niam hlob thiab niam ntxawm nkawv los neeg los plhws phlws Sua niam lub tob hau thiab los hais npaum li cas rau Sua niam los Sua niam yeej tsis ntsiag, lub siab quaj dhuj dhi tsis paub yuav ua li cas, ntshai ruj rwg nws tus me ntxhais tsis zoo rov los lawm xwb...

Tib pliag zoj, Tsab tuaj txog ntua.  Nws mus nug tau Sua chav nyob qhov twg, nws thiaj khiav zoj los txog rau ntawm Sua niam thiab cov txiv hlob txiv ntxawm lawv. Tsab los txog ntua, nws thiaj nug zoj tias....

"Sua niam...Pajhuab a...Sua nyob qhov twg os?  Sua puas ua li cas os?  kuv tuaj txog lawm kuv yuav mus saib Sua os..."

Tsab hais tus me txog siav qhi tawm hws lug vim nws khiav yeev los txog rau ntawm lawv xwb.  Sua niam tseem quaj quaj, tsis tau teb Tsab.  Pajhuab thiaj li hais rau Tsab tias,

"Tsab, lub teeb faiv fab uas ntsuas Sua lub plawv ntoj ntawd cig liab liab thiab quaj nrov nrov es naim maum los mus rau hauv lawm tsis pub peb mus saib Sua li...Tsis paub xyov zoo li cas ziag no lawm...kuv niam peb tseem tos seb nais maum yuav tawm los hais li cas xwb os..."

Pajhuab hais yam kua muag ntws si tawm los...Tsab tsis pom qab yuav ua zaj twg, nws cia li quaj pos muag nti rau ntawm lub qhov rooj yuav nkag mus hauv Sua chav.  Ke quaj ke xav hauv nws lub siab tias,

"Sua a, Sua, kuv twb tuaj txog lawm os, koj puas hnov os?  thov txhob ua li cas nawb, thov koj txhob ua li cas os...Sua, kuv tuaj txog lawm os..."

Sua tus txiv hlob thiaj li los plhws zog Tsab thiab hais tias,

"Me tub, koj txhob quaj quaj heev heev, tej zaum Sua yuav tsis ua li cas thiab...los zaum rau tom no es peb sawv daws mam li maj mam tos nyaj yuav tsis ua li cas...tau ua siab loj thiab nawb..."

Nws hais li tag, nws thiaj muab Tsab cab los nrog nws zaum rau lub rooj tab tiv ntsia ntsoov Sua lub qhov rooj.  tom qab li ntawm 4 teev, tus nais maum mam tawm hauv Sua hoob los.  Los nrog Sua niam tham, tabsis Sua niam tsis paub lus mekas.  Ces tus thaj maum thiaj nrog Pajhuab thiab Tsab nkawv tham.  Tus thaj maum hais rau Pajhuab tias,

"Unfortunately, this is a very fragile person we have here.  This is the best we can do at the moment.  Her situation is very critical...If we proceed, she will die instantly...either way...she is beyond curable.  We got her back to being stable, but her chances is very slim.  Let's hope the heart ventilation help pumps her blood circulation and  lung respiration.  She will need her rest now, or at least about a few hours before any of you can go see her, but since you all are here, only direct family members may go see her for now and then let her rest."

Tus thaj maum hais li tag ces, nws thiaj li mus lawm.  Pajhuab thiaj tig los hais rau nws niam thiab tus txiv hlob thiab txiv ntxawm thiab cov txheeb ze tias,

"tus thaj maum los hais tias, tsam no Sua qhov mob no yog ib qho uas loj heev lawm, lawv kuj pab kawg kev li uas lawv pab tau lawm xwb.  Tsis muaj lwm txoj hau kev yuav pab tau Sua lawm..."  Pajhuab ke hais kua muag ke ntws si tawm los..." Lawv muab lub pab ua pa thiab pab ntoj nws lub plawv no coj los pab nws lub cev, es cia seb yuav zoo li cas ntxiv...Sua yuav tau so li ntawm 2-3 xoj moos uas ntej uas peb yuav mus saib tau nws tabsis mas yog peb twb tuaj tag li no lawm no ces peb mus saib nws ib me pliag los tau tabsis tom qab ntawd tau cia nws pw so me ntsis tso no..."

Nws niam lawv sawv daws thiaj li nkag mus rau hauv Sua chav...mus txog hauv, Sua niam thiaj li mus plhws zog Sua lub tob hau...quaj ua kua muag ntws si los...

"Me ntxhais Sua, niam tus me ntxhais, koj ua li cas lawm os?  Sim qhia ib los rau niam seb, niam ua txhaum rau yam twg, es lub ntuj thiaj rau txim loj tag npaum li no rau niam tus me ntxhais os....me ntxhais Sua, koj puas hnov niam os...?"

Tsab ntsia Sua pw ntawm txaj, zoo li nws tsaug zog lawm xwb...xyov tsam no, Sua ho mus nuam yaj rau qhov twg es yuav tseg nws lub cev pw rau ntawm lub txaj ntawd xwb...Tsab ntsia ntsia, kua muag ntws twj ywm los...nws los rau ntawm Sua ib sab, los tuav zoj Sua txhais tes...thiab hu Sua lub npe...

"Sua, kuv tuaj lawm os...rua koj lub qhov muag los ntsia kuv ib me pliag seb....kuv tuaj lawm os...kuv yog koj tus Tsab na, koj puas hnov kuv os...rua koj lub qhov muag los saib kuv ib pliag os lov Sua....Sua a...koj puas hnov kuv os lov...."

Tsab cia li tsis nco qab txaj muag li lawm. Nws plhws zog Sua lub me plhu ntsia Sua lub me hauv siab ua pa siab pa qis, ho tig mus ntsia lub uas pab Sua ua pa ntoj mus siab mus qis thiab...nws lub kua muag poob nthav tawm los.  Nws khawm zog Sua rau hauv nws lub xub ntiag, cheem tsis tau nws lub kua muag ntws tawm zom zaws los thiab tsa loo suab quaj hu Sua lub npe tsis tso tseg.

Sua niam los plhws plhws Tsab lub tob hau ua rau cov neeg ib puag ncig nyias quaj nyias zom zaws.  Tsab thiaj tsa hau mus ntsia Sua niam thiab hais tias,

"Niam, kuv thov koj ib yam puas yuav tau?  kuv thov koj muab Sua rau kuv os?  Thov koj muab Sua wb tis ua txij nkawm tamsim no puas yuav tau?  kuv thov koj os niam....kuv thov koj...thov koj os...."

Sua niam haj yam quaj, lub kua muag haj yam ntws los, tsis paub yuav hais li cas rau Tsab thiaj li yuav zoo.  Tsab lo lus thov ntawd ua rau neeg txhua tus nyob hauv lub kua muag ntog lam los.  Tsab tuav rawv Sua txhais tes, Sua cov ntiv tes txias tag lawm zuj zus, tsuas yog hnov Sua ua pa zim zuag lawm xwb.  Tsab ntsia zoo li yog tus neeg uas tsaug zog lawm xwb tiamsis mas ua cas yuav mob hauv nws lub siab ua luaj tuaj.  Sua niam thiaj li hais rau Tsab tias,

"me tub Tsab, Sua tseem tsis tau tsim es, cia Sua tsim tso, muaj dabtsi, peb mam li tham tom qab os nawb, koj mloog kuv ua niam hais os..."

"ua li mas niam...kuv mam tos Sua tsim tso los mas..."

lawv sawv daws nyob ib pliag zoj ces, tus Nurse thiaj los hais kom lawv sawv daws tawm sab nrauv...es cia Sua pw ib chim tsoes li ntawm 3-4 xoj moos mam li los saib tau Sua dua.  Lawv tawm tag sab nrauv...mus nyob rau tom hoob nyob tos...lawv sawv daws nyob tov tos ntev tsawv li ntawm 4-5 xoj moos.  Tsab maj maj rov mus saib Sua dua. Nws thiaj li rov mus xauj Sua tom Sua chav.  Nws pom zoo li Sua kuj txav nws tus ntiv tes me ntsis...ua rau Tsab zoo siab luag nyav...nws khiav loo los hais rau lawv tias, zoo li Sua tsim lawm sub...ua rau lawv sawv daws rov los zoj rau tom Sua chav.  Tabsis los txog, cas tseem zoo li qub xwb.  Lawv rov los nkag rau hauv Sua hoob dua.  Tsab rov los muab Sua plhws zog rau hauv nws lub xub ntiag, ua kua muag teev yees los.  Cas lub kua muag rau tus neeg nws hlub, yeej cheem tsis tau kom txhob poob li, tsuas muaj ntws si tawm los xwb.  Tsab plhws ruj rawv Sua lub me plhu tsis tso tseg.  Ntsia ntsia Sua npaum li cas los tsis dhuav tsis txaus nws lub me siab.  Ke ntsia ke quaj, ua kua muag ntws lug poob rau ntawm Sua sab plhu.  Ib pliag zoj, Sua thiaj rua qhov muag pluj pliav los saib Tsab.  Xyov Sua tsim los tsis tau, tiamsis pom Sua ob lub qhov muag rua los xam yuj yees.  Tsab luag nyav thiab ncav loo mus nwj loo Sua daim di ncauj thiab hnia Sua sab plhu tsis tso tseg.  Sua niam thiaj hais tias,

"me ntxhais Sua, koj puas pom niam os...koj puas pom peb na me ntxhais...peb sawv daws tuaj saib koj os, Tsab tuaj nov thiab os, Tsab puag rawv koj xwb os me Sua...koj puas hnov na me ntxhais..."  

Sua tsis teb ib los lus li..nws tsuas xam xam xwb.  Tsab muab nws puag ruaj zog rau hauv Tsab xub ntiag, kua muag tseem ntws lam lug los.  Tsab rov tsa ncauj thov Sua niam dua ib zaug ntxiv...

"wss niam a, kuv thov koj muab Sua wb tis ua txij nkawm os, koj puas kam na.  Koj puas kam muab Sua tis rau kuv os...?" Txij no mus kuv yuav hlub Sua ib leeg xwb, tsis pub Sua muaj mob muaj nkeeg, tsis pub Sua txom nyem siab li no li os...kuv thov koj os niam...thov koj os yom..."

Sua niam quaj quaj kua muag ntws si los, tsis paub yuav teb Tsab li cas rov qab...nws thiaj los plhws plhws Tsab lub tob hau thiab hais tias,

"Me tub Tsab, yog koj hlub kuv tus me Sua npaum li ko tiag, kuv mam muab rau koj los yeej tau, tabsis tsis paub txoj hmoo yuav los li cas, es tsam koj yuav tu tusiab heev xwb..."

"niam, yog koj kam muab Sua rau kuv lawm, txawm txoj hmoo yuav los zoo li cas los, kuv yeej txaus siab, tsis tusiab li os...tsuav yog kuv tau Sua lawm xwb. Sim neej no, kuv hais rau koj tus ua niam thiab rau Pajhuab thiab cov txheeb ze ntawm no tias, sim neej no, los yog tiam me neej no kuv yuav hlub Sua ib leeg nkaus xwb...tsis muaj leej twg los ntxiv Sua li lawm...Niam, thov koj kam kiag os nawb, muab Sua rau kuv os..."

Tag nrho txhua leej nyob rau hauv yeej zoo siab tau hnov Tsab hais cov lus no, ua rau txhua leej tusiab thiab quaj nrog.  Cas yuav pab hlub nkawv ob leeg ua luaj, es txoj hmoo yuav zoo li cas tiag...

Sua xam ncig lees qhov txhia chaw hauv nws lub hoob, tiamsis zoo li tsis paub tias muaj neeg nyob nrog nraim nws txhua lub sij hawm.  Sua xam xam tag, nws ho los ntsia ntsia Tsab ntev loo, tiamsis zoo li nws lam ntsia ntsia xwb, tsis paub tias Tsab yog leej twg...Tsab muab Sua puag dua rau hauv xub ntiag...hu rawv Sua lub npe seb Sua puas yuav hnov Tsab lub suab hu nws.  Sua ntsia ntsia Tsab ntev loo, ces nws tig mus ntsia nws niam...tag nws rov los ntsia ntsia Tsab dua....

"Sua a, Sua, kuv tus me Sua, koj puas pom kuv os kuv tus me neeg zoo, kuv tuaj txog lawm os...koj puas pom kuv nov na?  Tsab hais lus luag nyav rau Sua.

"Tsab a......" Sua hais ib los lus tsuag tsawv tuaj rau Tsab...Sua lo lus tu nrho tag xwb, Sua ib ce xyoob tas nrho, lub cev zog ntaug tag nrho.  Sua lub tob hau qhau loo los pw ntawm Tsab txhais tes, ob lub qhov muag rov qi yam li tsaug zog loo lawm...thooj txhij thaum ntawd, lub teeb liab liab uas ntsuas Sua ua pa thiab pab ntoj Sua lub plawv ntawd rov cig liab plaim thiab lub siab pib quaj nrov nrov dua...Cov thaj maum maj nroos rov los rau hauv Sua hoob thiab hais kom lawv sawv daws tawm kom tag rau sab nrauv.  Tsab tsa loo suab quaj nrov nrov tuav rawv Sua txhais tes yeej tsis kam tso li.

"Sua..! Sua a..! Kuv tus me Sua..! koj yeej yuav tsis ua li cas li os..! Tsim los os Sua..! Tsim los na..kuv twb tuaj txog lawm na...Sua! Sawv los na, koj puas cia li sawv los...! Sawv los na..! Sua..! Sua..! Kuv hlub koj os...kuv hlub koj os Sua..!"

Tus thaj maum los hais rau Tsab tias kom Tsab cia li tawm tsis txhob laug caij, lawv thiaj li yuav muaj caij los seb puas yuav pab tau Sua.  Nws muab Tsab txhais tes rub rhe los thiab muab Tsab lawv sawv daws coj tawm tag rau sab nrauv, ces kaw loo qhov rooj.  Tsab zaum ntua quaj li tus menyuam yaus, hos Sua niam los quaj loo tsis paub yuav ua zaj twg.  Pajhuab ntsia nws niam quaj quaj tsis paub yuav ua li cas, nws thiaj li mus khawm nws niam.  Hos nws niam ho khoov mus khawm Tsab kom Tsab tsis txhob quaj quaj.  Lawv nyob sab nrauv tos li ntawm 1 xoj moos tus thaj maum mam li tawm los.  Thaum tus Thaj maum tawm los, nws lub ntsej muag ntshaus ntsho thiab tsis luag, Tsab paub zoj hauv Tsab lub siab tias Sua tsis zoo lawm...Tsab tsis tos nug dabtsi li, Tsab cia li quaj loo khiav nkag loo mus rau hauv Sua hoob.  Tus thaj maum nyob sab nraum no nrog Pajhuab tham thiab Pajhuab tseem txhais rau nws niam thiab cov txiv hlob txiv ntxawm lawv.  Tsab nkag nplho los rau hauv Sua chav no thaj maum lawv twb muab daim ntaub dawb los vov Sua lub ntsej muag lawm.  Tsab mam li los muab daim ntaub dawb yaws loo rau nrav, nws qawm loo Sua los rau hauv nws lub xub ntiag quaj nrov nrov.  Quaj npaum li cas, hu npaum li cas los Sua tsis hnov li lawm.  Tsam no quaj npaum li cas los Sua tsis los qhov twg los li lawm, cas yuav mob siab ua luaj.  Sua niam lawv mam li nkag los rau hauv Sua hoob, Pajhuab los hais rau Tsab tias,

"Tsab, thaj maum tias peb saib ib pliag tso es lawv yuav los coj Sua mus no os..."

Pajhuab lawv txhua tus quaj zom zaws...Sua niam los plhws Sua tsis txawj tag..Pajhuab los plhws plhws Sua thiab hais tias,

"niam laus aw, koj txawm yuav ncaim peb sawv daws mus tiag tiag li lawm lov...niam laus, cas koj yuav siab phem ua luaj li....koj txawm yuav tso kuv niam peb sawv daws tseg tiag li lov...?"

Tsab ke plhws Sua ke quaj ke hu Sua.  Tsab quaj quaj nws txhaws qa tag, los cas Sua tsis sawv rov los lawm...Sua lub ntsej muag nphob tag, tsis zoo li thaum tseem ua neej nyob.  Tsab muab Sua khawm ntev loo rau hauv nws lub xub ntiag.  puas yuav muaj neeg paub hais tias sim neej no yam uas mob siab tshaj plaws, ces yog ntsia ntsoov tus neeg yus hlub plam plaws ntawm yus lub xub ntiag es ua ntiaj teb ntsiag moo too tsis los qhov twg los...Tsab puag rawv Sua rau hauv Tsab lub xub ntiag tsis tso hlo li, yim khawm yim quaj yim los kua muag...nws khawm khawm Sua txog ntua thaum uas tus thaj maum rov los hauv Sua chav es hais tias txog caij lawm lawv yuav tau coj Sua mus...Lawv los hais Tsab kom Tsab tso Sua, es lawv muab daim ntaub dawb vov Sua lub ntsej muag...Tsab yeej tsis xav tso Sua li, zoo li yog tso ces, yuav tag nrho sim me neej no caum tsis cuag Sua lawm...xav zaj twg mob siab ua luaj, xav tuag kiag ua ib pawg av nrog Sua mus lawm xwb...los cas tuag tsis tau...es yuav tau ntsia Sua rau ntawm no...nws tuav Sua txhais tes ruaj ruaj...thiab hais tias,

"Sua, kuv hlub koj os Sua...sawv los ma es wb yuav us os Sua...koj puas paub sim neej no kuv hlub koj dua ntais.  Sawv los es wb yuav mus ncig wb tej qub chaw, yuav mus tsuj wb tej qub hneev taw, yuav mus taug wb tej qub lw, yuav mus saib toj roob hauv pes, yuav mus tham txog wb lub neej rau yav tom ntej os Sua...sawv los ma, cas koj yuav mus lawm hlo tseg kuv nyob rau tom qab es kuv lub neej yuav ua li cas os...Sua...kuv hlub koj heev li os..kuv hlub koj os Sua....kuv hlub koj os....kuv hlub koj ib leeg xwb os....Sua, kuv cog lus tiam me neej no, kuv yuav tsis yuav pojniam yog kuv tsis muaj koj...ntshe yuav tsis muaj ib tug twg los hloov tau kuv tus me Sua tawm hauv kuv lub siab mus li os Sua...nco ntsoov mog, kuv hlub koj os...

Tsab muab Sua puag loo ua zaum kawg hauv nws lub xub ntiag...ntsia Sua lub me plhu tsaug zog ua zaum kawg uas paub tias yuav tsis tsim rov los lawm...txoj kev hlub los kawg li no...lub neej uas tsis tau los sib sau...vim thaum kawg...av luaj quas li nkaus, thiaj tsis tau los sib sau....

Sua lub ntsej muag luag nyav tseem pom zim zuag zoo li yog nag hmo.  Tus duab dhia rhees tseem zoo li tseem pom khiav yuj yeev...thaum Sua thiab Tsab nkawv nyob tom hav dej tim Yosemite National Park sib ntov dej khiav yeev rau ub rau no, zoo li tseem nyob tshiab khiv tsis tau dua...tiamsis cas sij hawm twb dhau mus lawm deb...tig loo rov xav twb tau 4 xyoos lawm tiag....hnov tus cua tuaj laj ntxiag...zoo li Sua los hnia Tsab ib pas ntawm nws sab plhu...hnov zoo li Sua lub suab luag nyav ntawm nws pob ntseg...tus cua tshuab ib vuag zoo li hnov tsw Sua tus ntxhiab...Tsab tsa loo qhov muag ntsia xam zoj qhov txhia chaw cas yog nws ib leeg tseem zaum ntawm Sua daim lag zeb.....tig mus ntsia ntawm daim lag zeb tseem pom Sua daim duab luag li nyav tuaj rau nws....Tsab luag nyav rov mus rau ntawm daim duab ntawm lag zeb...thiab ntxhi hais tias, "KUV TSEEM HLUB KOJ IB LEEG XWB OS SUA... koj nyob es kuv mus lawm nawb, lwm zaus mam rov tuaj saib koj dua os kuv me nplooj siab tus kuv hmov tshua...."  

Tsab rhais tsis ntse mus deb lawm zuj zus ntawm daim lag zeb...mus txog rau tom nws lub tsheb, nws tig loo rov los ntsia rau tom Sua daim lag zeb, ib pliag zoj, rov pom loo tus me npauj npaim dawb dawb ya yuj yees los txog rau ntawm nws...nws ntsia ntsia tus me npauj npaim dawb dawb...nws luag li nyav seev zoj dua tias,

"Ab npauj npaim os npauj npaim, kheev lam koj yog kuv tus me Sua mav, kuv yuav muab koj puag loo rau hauv kuv lub me xub ntiag, es coj koj nrog kuv mus es seb puas yuav tshav kuv ntuj lawm ib ncuas kev os me npauj npaim...."

Nws ntsia ntsia tus npauj npaim ya mus lawm deb zuj zus ntawm nws lawm, ces nws thiaj nkag loo rau hauv tsheb tsav los deb zus zus ntawm lub Zoo Cememtry lawm....


ZAJ DABNEEG NO LOS XAUS LI NO LAWM XWB...UA TSAUG UAS NEJ LOS NYEEM ZAJ DABNEEG NO NAWB...THOV NPAJ SIAB TOS ZAJ YUAV TAWM TSHIAB TOM NTEJ NO MOG...
NCO kuv tsis PLOJ
NCO ntsoov kuv MOG
NCO kuv tag tiam NO


KhawsCia6Kuv Tag1SIM

#13
KhawsCIAraukoj

KhawsCIAraukoj

    Bachelor Degree 1

  • Members
  • 116 posts
Reputation: 0
Neutral
Kuv me leejmuam PAUB1zaugNCO1sim, cas nyeem tag koj zaj dabneeg no, tsis hais lo lub kua muag nrog...tu siab tsis txawj tag....Yog yus tau hlub leejtwg lawm yuav tsum hlub tiag tiag thaum ua neej nyob av tsij hlub kom kawg siab kawg ntsws, es txhob cia thaum lub sijhawm yus lub qhov muag qis lawm zuj zus ces thaum ntawd mam li hlub ntshe lig lawm os.

I love you 1 day
I love you 2 weeks
I love you 3 months
i Love you 4 ever...ENTERNITY


#14
PAUB1zaugNCO1sim

PAUB1zaugNCO1sim

    Bachelor Degree 1

  • Members
  • 153 posts
Reputation: 1
Neutral

View PostKhawsCIAraukoj, on Aug 25 2008, 04:35 PM, said:

Kuv me leejmuam PAUB1zaugNCO1sim, cas nyeem tag koj zaj dabneeg no, tsis hais lo lub kua muag nrog...tu siab tsis txawj tag....Yog yus tau hlub leejtwg lawm yuav tsum hlub tiag tiag thaum ua neej nyob av tsij hlub kom kawg siab kawg ntsws, es txhob cia thaum lub sijhawm yus lub qhov muag qis lawm zuj zus ces thaum ntawd mam li hlub ntshe lig lawm os.


Ua neej nyob tsis pom tom ntej os hmoob tej tub....tabsis yeej yog mas...yuav hlub ces hlub kom tau thaum tseem ua neej nyob xwb...Av luaj quas tag nrho seev saub npaum twg los tsis los qhov twg los li lawm mav. yuav muab me kab me noog txhua nrho los xav zoj tias seb puas yog tus neeg yus hlub lawm xwb tiag mas....
NCO kuv tsis PLOJ
NCO ntsoov kuv MOG
NCO kuv tag tiam NO


KhawsCia6Kuv Tag1SIM

#15
Guest_Guest_*

Guest_Guest_*
  • Guests
Reputation: 0
Tsis sib hlub, thov kom txhob sib paub, thiaj tsis mob sib .

#16
Guest_Guest_*

Guest_Guest_*
  • Guests
Reputation: 0
SIb paub lawv yuav tsum sib hlub kom txog qhov kawg.